Qazaqstan TMD-nyń saqtalýyna eleýli úles qosyp keledi - Sergeı Lebedev

ASTANA. QazAqparat - Qazaqstan Táýelsiz Memleketter Dostastyǵynyń saqtalýyna eleýli úles qosyp keledi. Bul týraly Táýelsiz Memleketter Dostastyǵy Úkimet basshylary keńesiniń otyrysynan keıingi brıfıngte TMD-nyń atqarýshy hatshysy Sergeı Lebedev málim etti, dep habarlaıdy QazAqparat.

«Astanada Táýelsiz Memleketter Dostastyǵy Úkimet basshylary keńesi otyrysynyń ótýi oqıǵasy taǵy da Qazaqstan tarapy iri sharalardy uıymdastyrýda óte qolaıly ári berekeli alań ekenin dáleldedi. Bir apta buryn Almaty qalasynda TMD-ǵa múshe memleketterdiń qaýipsizdik organdary men arnaýly qyzmetteri basshylary keńesiniń 45-otyrysy ótken bolatyn. Atap aıtqanda, bıyl Qazaqstan tóraǵa bolmasa da, Úkimet basshylary keńesiniń otyrysyna Astanada talqylaý alańyn usynyp, tıisti qujattarǵa qol qoıý turǵysynda óte jemisti boldy», - dedi ol.

Sonymen qatar Sergeı Lebedev  8 qarashada Astanada Ujymdyq qaýipsizdik týraly shart uıymynyń sammıti ótetinin, al 9 qarashada Qazaqstan men Reseıdiń aımaqaralyq yntymaqtastyq forýmy (Petropavl qalasynda) uıymdastyrylatynyn eske saldy.

«Osy faktilerdiń barlyǵy QazaqstanTáýelsiz Memleketter Dostastyǵynyń saqtalýy men nyǵaıýynyń jaqtasy bolǵanyn ári osy baǵytta jumysyn jalǵastyra beretinin bildiredi. Bul pikirdi búgin Dostastyq elderi delegatsııalarynyń basshylaryn qabyldaý kezinde Qazaqstan Prezıdenti Nursultan Nazarbaev ta rastady», - dedi S. Lebedev.

Budan buryn habarlanǵandaı, búgin elordada Táýelsiz Memleketter Dostastyǵy Úkimet basshylary keńesiniń otyrysy bastalǵan bolatyn.