Qazaqstan TMD elderi ishinde aılyq tabys kólemi boıynsha 2-orynda tur

ASTANA. QazAqparat - TMD elderi ishinde nomınaldy ortasha aılyǵy eń tómeni Tájikstan bolyp qalyp otyr. Bul týraly «Egemen Qazaqstan» habarlady.

Basylym muny TMD memleketaralyq statıstıkalyq komıteti daıyndaǵan «2014 jylǵy maýsym aıyndaǵy aılyq jalaqy tóleýdiń áleýmettik-demografııalyq statıstıkasynyń negizgi kórsetkishteri» atty esepke súıene otyryp baıandady. Onda bıylǵy jylǵy maýsym aıynda Tájikstandaǵy ortasha jalaqynyń 918 somonıdi (shamamen $180) quraǵany atap kórsetilgen. Bıylǵy jyldyń basymen salystyrǵanda, Tájikstanda ortasha jalaqy 104 somonıge ($20-dan sál kóp) ósken.

Dostastyq statıstıka komıteti sonymen birge qalǵan memleketterdegi deńgeıdiń qandaı ekenin jaıyp salady. Osy derek boıynsha, aılyq jalaqynyń kóptigi jóninen Reseı Federatsııasy top bastap keledi. Ondaǵy ortasha aılyq $900 shamasynda. Ekinshi orynda - Qazaqstan. Onda ortasha aılyq $690-dy quraıdy. Úshinshi orynnan $590 kórsetkishimen Belarýs kórinip tur.

Budan arǵy oryndarǵa myna respýblıkalar osy retterimen jaıǵasqan: Ázerbaıjan ($568), Armenııa ($408), Moldova ($294), Ýkraına ($277), Qyrǵyzstan ($236). Al Túrkimenstan men Ózbekstan óz derekterin bermeı qoıǵan.