Qazaqstan TMD-da taksı baǵasy eń qymbat elderdiń qatarynda

ASTANA. QazAqparat – Elimizde taksı qyzmeti bir jyl ishinde 12 paıyzǵa qymbattady, dep habarlaıdy QazAqparat tilshisi.

Energyprom.kz portalynyń málimetinshe, óńirler arasynda taksı ósiminiń baǵasy Atyraý turǵyndarynyń qaltasyna salmaq saldy.

Óńirde qyzmet quny 1 jyl ishinde 37,5 paıyzǵa qymbattap otyr. Odan keıingi oryndarda Jetisý (33 paıyz) men Abaı oblystary (31,2) tur.

Al Aqmola oblysynda taksı qyzmeti jyl ishinde ne bári 0,5 paıyzǵa kóterilse, Qaraǵandy, Túrkistan jáne Ulytaý oblystarynda baǵa bir jyl burynǵy deńgeıde.

Numbeo málimetine sáıkes, 2023 jyldyń 14 aqpanyndaǵy málimet boıynsha standartty tarıf boıynsha 1 shaqyrymǵa taksı qyzmetiniń eń tómengi baǵasy Mysyr (0,16 dollar), Pákistan (0,19) jáne Belarýsta (0,2) tirkelgen.

TMD elderi arasynda taksı qyzmeti eń arzan elderdiń ondyǵyna Armenııa men Ózbekstan (0,26 dollardan), Ýkraına, Moldova jáne Reseı (0,27) kiredi.

Al taksı qyzmeti qymbat elderdiń qatarynda Qazaqstan (0,44 dollar) men Ázerbaıjan (0,59) bar.

Eń qymbat taksı qyzmeti myna elderde tirkelgen: Shveıtsarııa (4,25 dollar), Kýveıt (3,27) jáne ıAmaıka (3,26).

Aıta keterligi, ótken jyldyń qańtar-jeltoqsanynda elimizde taksı qyzmetin kórsetetin kompanııalardyń tabysy qundyq mánde jyl ishinde 16 paıyzǵa artyp, 5 mlrd teńgege deıin jetti.

Ótken jyly taksı qyzmetin 2,4 mlrd jolaýshy qoldandy. Bul bir jyl burynǵy kórsetkishten 1,2 paıyzǵa az.