Qazaqstan TikTok-ty japsa, neden utylady - BIP House prodıýseri pikir bildirdi

<p>ASTANA. KAZINFORM &ndash; Keıingi kúnderi TikTok jabyla ma, álde ishinara shektele me degen saýal kún tártibine shyǵyp aldy. Májilis depýtaty Erlan Saırov Premer-Mınıstrdiń atyna joldaǵan depýtattyq saýalynda TikTok-taǵy zańǵa qaıshy barlyq kontentti shekteý kerek degen paıymyn <a href="https://kaz.inform.kz/news/tik-tok-ti-balalar-ushn-katan-shekteu-kerek-deputat-9e32da/" target="_blank" rel="noopener">bildirdi</a>. Mádenıet jáne aqparat mınıstri Aıda Balaevanyń &laquo;Másele qarastyrylady&raquo; degen <a href="https://kaz.inform.kz/news/kazakstan-tik-tok-tin-bugattay-ma-abalaevanin-zhauabi-30ce2e/" target="_blank" rel="noopener">pikiri</a> eldegi jetekshi TikTok-haýstardyń basshylaryn da alańdatyp otyrǵan syńaıly.</p>

TMD kólemindegi eń tanymal platforma BIP House negizin qalaýshy Ashat Halımov Kazinform tilshisine osy tóńirektegi bastamalar týraly pikir bildirdi.

«Bizdiń oıymyzsha, buǵattaý degen sondaı bir oılanyp baryp qabyldanǵan sheshim bolmas. Qazir Qazaqstan bul turǵyda ózge elderdiń aldynda básekelestik basymdyqqa ıe. Ortalyq Azııanyń, tipti búkil Azııanyń eń tanymal TikTok blogerleri bizde. Biz – adamdarǵa kreatıvti kontentin damytý múmkindigin berip otyrǵan taza demokratııanyń aılaǵymyz. Kreatıvti ındýstrııa forýmynda Prezıdentpen kezdeskende ol kisi de TikTok ókili Qazaqstanǵa kelip ózimen kezdeskenin aıtty. YouTube nemese Instagram ókilderiniń Memleket basshysymen kelip kezdeskenin estimeppin», - deıdi Ashat Halımov.

Foto: A. Halımovtyń jeke muraǵatynan

Onyń málimeti boıynsha, elde 32 TikTok-haýs bar. Onyń ekeýi TMD boıynsha eń tanymal platforma bolyp esepteledi. Bul áleýet Qazaqstandy TikTok-tyń Ortalyq Azııadaǵy digital-haby ete alady.

«TikTok-tyń qazaqstandyq segmentinde 15 myń blogerdiń oqyrman sany myńnan 100 myńǵa deıin barady. Oqyrman sany 100 myńnan 1 mıllıonǵa deıin baratyn 300 bloger, 1 mıllıonnan 56 mıllıonǵa deıin aýdıtorııamen jumys istep júrgen 45-50 bloger bar. TikTok-ta 1-15 jyl boıy turaqty jumys istep kele jatqan blogerler aıyna 200-400 myń teńge aralyǵynda tabys tabady. Oqyrman sany 100 myńnan asatyndardyń tabysy 1 mln teńgege deıin jetedi. Al 1 mıllıonnan astam oqyrmany bar blogerlerdiń tabysy 10 mln teńgege deıin barady», - deıdi prodıýser.

Sondaı-aq, TikTok platformasynda jaǵymsyz tendentsııalar kóp deıtin pikirlerge jaýap berdi.

«Mysaly, «VKontakte» áleýmettik jelisinde ózge paltformalardan qaraǵanda pornografııalyq mazmun kóp. «Telegramm» jelisin esirtki jasyrýshylar qalaı paıdalanatynyn kórip otyrmyz. Al Instagram jarııalanǵan kontentti buǵatatmaıdy deýge bolady», - deıdi Ashat Halımov.

Onyń sózinshe, TikTok bul máselelerde óte saq.

«Bizde «Otbasy baqylaýy» deıtin paıdaly fýnktsııa bar. Osy arqyly qoldanýshylardy beıádep kontentten qorǵap, plaftormany qoldaný erejesin qadaǵalaımyz. Onyń ústine, 18-ge tolmaǵan qoldanýshylarymyz vıdeo júkteı almaıdy jáne olardyń kontenti birden buǵattalady. Demek, balalar TikTok-ta bloger bolyp, pikirin bólise almaıdy. Instagram-da ondaı shekteý joq», - deıdi ol.

Bul sózine ol «Amınka Vıtamınka» atymen tanylyp ketken blogerdiń TikTok-taǵy akkaýnttaryn mysal etip keltirdi.

«Qazir ol tórtinshi akkaýntyn ashty. Ýaqyt óte kele ony da buǵattaıdy. TikTok bottardy da anyqtap, buǵattap otyrady. Keıbir blogerler óńi tym jas bolǵany úshin jas shekteýinen zardap shegip jatady. Lýna degen blogerdiń jasy 22-de bolǵanyna qaramastan, túri jas bolǵany úshin ǵana eki birdeı akkaýntyn buǵattap tastaǵan. Sondyqtan bizden tarap jatqan kontentti basqaryp, baqylaý jaǵy ózge áleýmettik jelilerge qaraǵanda jolǵa qoıylǵan. Biraq bizdiń platformany da teris pıǵylda paıdalanatyndardyń bar ekenin joqqa shyǵarmaımyn», - deıdi prodıýser.

Sondaı-aq, ol TikTok tikeleı efırlerdi qatań qadaǵalaıtynyn aıtady.

«Tikeleı efırge shyǵyp teris pıǵyldaǵy kontent taratyp otyrǵandarǵa 5 shaǵym tússe buǵattap tastaı alady. Bizdiń BIP House-da bir qyzdyń bilegi ashyq bolǵany úshin ǵana efırin buǵattady. Bir qoldanýshyǵa unamaı qalyp, 5 ret shaǵym jibergen eken. Sol úshin efır jabyldy», - Ashat Halımov.

Prodıýser sóz sońynda Qazaqstan TikTok-ty jabý nemese shekteý týraly sheshim shyǵarmaı turyp, naryqtyń qanshalyqty damyp ketkenin eskerý kerek dep esepteıdi.