Qazaqstan teńiz porttarynda júk aınalymy 5 mln tonnadan asty
«Túrli tonnadaǵy kemelerge qyzmet kórsetetin Aqtaý, Baýtıno jáne Quryq teńiz porttary – el ekonomıkasyn odan ári damytýǵa múmkindigi mol damýshy teńiz porttary. QR Indýstrııa jáne ınfraqurylymdyq damý mınıstrligi Kólik komıtetiniń «Qazaqstan Respýblıkasynyń porttarynyń teńiz ákimshiligi» respýblıkalyq memlekettik mekemesi – Aqtaý, Quryq jáne Baýtıno teńiz porttarynyń akvatorııasynda teńiz kemelerin paıdalaný salasyndaǵy baqylaý-qadaǵalaý jáne iske asyrý fýnktsııalaryn júzege asyratyn aýmaqtyq bólimshe. 2019 jyldyń qortyndysynda olardyń jalpy júk aınalymy 5 mln tonnadan asty», - delingen baspasóz relızinde.
Málim etilgendeı, Porttardyń teńiz ákimshiliginiń ınspektorlary kemelerdi teńizge shyǵar aldynda tekserýdi QR ratıfıkatsııalaǵan halyqaralyq konventsııaǵa, sondaı-aq qoldanystaǵy zańnamalyq aktilerge sáıkes júzege asyrady.
«2019 jyldyń basynan porttardyń teńiz ákimshiliginiń ınspektorlary úsh portta 4174 keme kirisin rásimdedi. Teńizge shyǵar aldynda 340 keme qaraldy jáne 11 teńiz kemesine aıdynǵa shyǵýǵa ruqsat berilmedi. Ákimshilik quqyq buzýshylyq jasalǵany úshin 56 ákimshilik is qozǵaldy. Kemelerdi tekserý barysynda keme qujattary, tirkeý qujattary, kemeniń qoldanystaǵy kýálikteri, keme ekıpajynyń dıplomdary men kýálikteri, avarııalyq qutqarý quraldary, órt sóndirý quraldary, navıgatsııalyq jáne mehanıkalyq jabdyqtar, mashına bólimshesi, keme korpýsy, júk markasy, tasymaldanatyn júktiń qujattary tekseriledi», - dedi mınıstrlikten.
QR Porttarynyń teńiz ákimshiligi qurylǵan sátten bastap teńizshiniń jeke kýáligi men teńizde júzý kitapshasy berilip keledi. Ol qazaqstandyq teńizshilerge búkil álemde jumys isteýge múmkindik beredi. Sonymen qatar 2020 jyldan bastap teńizshiniń kásibı dıplomyn berý bastaldy.