Qazaqstan teńdestirilgen syrtqy saıasatty ustanady – Muhtar Tileýberdi
Syrtqy ister mınıstri suhbatta Reseı men Ýkraınanyń tarıhı turǵydan Qazaqstanǵa tatýlas elder ekenin aıtty.
«Meni Ýkraınadaǵy shıelenis qatty alańdatady. Qazaqstan úshin Reseı men Ýkraına – tarıhı turǵydaǵy tatýlas elder. Qazaqstan Prezıdenti Qasym-Jomart Toqaev eki memlekettiń de basshylarymen únemi baılanysta jáne olardy kelissóz ústeline otyrýǵa, daýdy sheshýdiń beıbit jáne dıplomatııalyq jolyn tabýǵa shaqyrýda», - dep atap ótti QR Syrtqy ister mınıstri.
Ol ekonomıkalyq turǵydan Reseı men Qazaqstannyń tyǵyz baılanysta ekenin jáne Reseı Federatsııasyna qarsy sanktsııalar Qazaqstan ekonomıkasyna keri áserin tıgizgenin aıryqsha atap ótti.
«Qazaqstan Reseıge qarsy sanktsııalarǵa qatyspaıdy, biraq sanktsııalardy aınalyp ótetin túrli múmkindikterdi paıdalanbaıdy degen qaǵıdany ustanady. Qazaqstan kópqyrly salmaqty dıplomatııany júrgizedi. Biz Reseımen, Qytaımen, Ortalyq Azııadaǵy kórshilerimizben, sondaı-aq AQSh, Japonııa, Eýropa elderi, Ulybrıtanııa sııaqty álemdik derjavalarmen ózara tıimdi jáne teń quqyqty qatynastardy damytýǵa tyrysamyz. Bul bizge barlyq elderden ınvestıtsııa tartýǵa múmkindik beredi», - deıdi Muhtar Tileýberdi.
Ásirese, Qazaqstannyń kólik jáne logıstıka úshin tranzıttik pýnkt retinde damý áleýetine erekshe kóńil bólinip otyr. Mınıstrdiń pikirinshe, Qazaqstan sheteldik ınvestıtsııalardy tartyp, Eýropa men Azııany baılanystyratyn hab bola alady.
«Bıyl Qazaqstan men Japonııa arasynda dıplomatııalyq qatynastar ornaǵanyna 30 jyl tolady. Biz sońǵy jyldary qarym-qatynastardyń joǵary deńgeıine qol jetkizdik jáne parlamenttik dostyq aıasynda bul qatynastardy strategııalyq áriptestik dep sanaımyz», - dep túıindedi mınıstr M. Tileýberdi.
Aıta keteıik, Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi «Ortalyq Azııa – Japonııa» dıalogynyń Syrtqy ister mınıstrleriniń 9-shy keńesine qatysý úshin Tokıoǵa saparmen bardy.