Qazaqstan temirjoldaǵy konteıner júgi boıynsha Qytaı men Eýropany jalǵaıtyn elge aınaldy

NUR-SULTAN. QazAqparat – «Qazaqstan temir joly» UK» AQ basqarma tóraǵasy Saýat Myńbaev elimizdiń temirjoldaǵy konteıner júgi boıynsha Qytaı men Eýropany jalǵaıtyn negizgi memleketke aınalǵanyn málim etti, dep habarlaıdy QazAqparat tilshisi.

«Qazaqstan temir jol» kompanııasy da shekteý sharalarynyń salmaqty yqpalyn bastan ótkerdi. Jolaýshylar poıyzdaryn toqtatýǵa májbúr boldyq. Mundaı shekteý sharalary tarıhymyzda osy kúnge deıin bolǵan emes. Ótken jyly Qaýipsizdik keńesiniń otyrysynda kompanııanyń damý keleshegin talqylaǵan edik. Naqty nátıje de boldy», - dedi Elbasy Nursultan Nazarbaev «Samuryq-Qazyna» keńesiniń otyrysynda.

«Qazaqstan temir joly» UK» AQ basqarma tóraǵasy Saýat Myńbaev kompanııanyń ótken jylǵy kórsetkishi týraly aıtyp berdi.

«Negizgi konteınerlik baǵdarlarǵa toqtala keteıin. Sebebi bul – tarıften tys negizgi kiristi ákep otyrǵan sala. Negizgi tabys burynǵysha Qytaı – Eýropa baǵytynan keledi. Negizgi úsh baǵyt bar. Birinshisi Mońǵolııa arqyly, ekinshisi taza Reseı arqyly, úshinshisi Qazaqstan arqyly ótedi. Biz tranzıttiń aýqymyn keńeıtip, 4 aıdyń ishinde osy úsh baǵdardyń ishinde úlesimizdi 91 paıyzǵa jetkizdik. Bizde bul baǵyttaǵy ósim 50 paıyzdy kórsetti», - dedi ol.

Saýat Myńbaev sonymen qatar Qytaıdan Orta Azııaǵa keletin tranzıt te edáýir artqanyn aıtyp ótti.

«Ońtústik Kavkaz baǵytyndaǵy tranzıt ósken joq. Ázerbaıjan men Grýzııa elderine shekteý sharalaryna baılanysty tranzıt azaıdy», - dedi ol.

Osy tusqa kelgende Elbasy aldaǵy ýaqytta osy Ázerbaıjan men Grýzııa elderi baǵyty áleýetke ıe bolýy kerektigin eskertti.

«Biz osy maqsatta Túrkııa, Grýzııa, Ázerbaıjan elderimen aýqymdy jumystardy júrgizdik», - dedi Elbasy.