Qazaqstan temirjol ınfraqurylymynda jastardyń úlesi qansha

ASTANA. QazAqparat - «Qazaqstan temir joly» UK» AQ «Magıstraldyq jeli dırektsııasy» fılıalynyń bas ınjeneri Qaıyrbaı Orynbaev temirjol jelisin jóndeý baǵdarlamasynyń oryndalýy týraly baıandady, dep habarlaıdy QazAqparat tilshisi.

Atap aıtqanda, búginde magıstraldyq temirjol jelisiniń uzyndyǵy 21 myń shaqyrymdy quraıdy. Olardy josparly jańǵyrtý jol júrý baǵytyndaǵy jolaýshylar úshin qaýipsizdik pen jaılylyqty, júkterdi jetkizýde jedeldikti qamtamasyz etedi.

Temirjol ınfraqurylymyna toqtalǵan Q. Orynbaev, bul salada jol sharýashylyǵy, elektr jelisimen jabdyqtaý sharýashylyǵy jáne avtomatıka men mehanıka, sondaı-aq vokzal sharýashylyǵy kiretinin aıtty.

«Bul ınfraqurylymda 47 400 adam jumys isteıdi, sonyń ishinde 84 paıyzy erler, al qalǵan 16 paıyzy áıelder. Salada qyzmet etetinderdiń arasynda 30 jasqa deıingi adamdar 17 paıyzdy qamtyp otyr», - dedi bas ınjener.

Onyń sózine qaraǵanda, byltyr ınfraqurylymǵa 110 mlrd teńge baǵyttaldy. Osy oraıda 2018 jyly «QTJ» UK» AQ jelileri boıynsha 867 shaqyrym jol kúrdeli jóndeýden ótti. Jalpy, túrli jóndeý qyzmetterimen 1 015 shaqyrym jeli jańartyldy. Jumystar aýyr tıpti jol mashınalaryn paıdalana otyryp júrgizildi.

Belgili bolǵandaı, atqarylǵan jumystar jolaýshylar poıyzdarynyń qozǵalys jyldamdyǵyn 585 shaqyrym jelide, al júk poıyzdary boıynsha 380 shaqyrym aralyqta jyldamdyq arttyrýǵa múmkindik berdi.