Qazaqstan temir jolynyń tóbelesken basshylary jumystan ketti

TARAZ. QazAqparat - Tarazdyń temirjol vokzalynyń basshysy men onyń orynbasarynyń jumys ornyndaǵy jaǵa jyrtysy úlken daýǵa ulasty. Belgili bolǵandaı tóbelestiń vıdeosy áleýmettik jelige taraǵannan keıin mekeme bastyǵy jumysynan bosatyldy, dep habarlaıdy QazAqparat «Jambyl» telearnasyna silteme jasap.

Áleýmettik jelige taraǵan tóbeles qazir qyzý talqylanyp jatyr. Osy jaǵdaıdan keıin «Qazaqstan temir joly» Ulttyq kompanııasy qyzý qandy qyzmetkerin jumystan qýǵan.

Vıdeodaǵy kadrda kabınetten dálizge shyqqan boıda eki kisi alysa jóneledi. Mundaǵy qyzmetkerlerdiń aıtýynsha, iri denelisi vokzal basshysy Talǵat Tólebekov. Al oǵan áli jetpeı astynda qalǵan - orynbasary Maqsat Sadyǵulov eken. Jaǵa jyrtysqan basshylardy qolastyndaǵy qyzmetkerler ajyratyp álekke túsken. Biraq birinshi basshy oǵan kónbeı, orynbasaryn sońynan qýyp baryp taǵy sabamaq bolady.

Tóbelesten eshkim zardap shekpegenimen, osy áreketi úshin Tólebekov ákimshilik jaýapqa tartylyp, 24 myń teńge aıppul tólegen. Jáne bul jaǵdaı úlken daýǵa ulasqannan keıin qyzmetinen de qýyldy.

Biraq burynǵy vokzal basshysy isti bulaı qaldyrmaıtynyn aıtady. Ol vıdeony áleýmetik jelige júktegenderdi sotqa bermek. Al orynbasaryn buıryqqa baǵynbaı, balaǵat sózderdi aıtqany úshin osylaısha sabasyna túsirmek bolǵanyn jetkizdi. 

«Taraz qalasynyń vokzal ǵımaratynda bolǵan oqıǵa 22 mamyrda oryn alǵan. Kompanııa komıssııa quryp tekseris ótkizdi. Nátıjesinde, Taraz vokzaly basshysymen jumys shartyn úzý týraly sheshim qabyldandy», - dep keltiredi KTK telearnasy «QTJ» UQ» AQ magıstraldyq jeli dırektsııasynyń vokzal sharýashylyǵy boıynsha atqarýshy dırektory Juban Kórpebaevtyń sózderin.