Qazaqstan temir joly jańa astyqty tasymaldaýǵa daıyn

ASTANA. QazAqparat - Qazaqstandyq temirjolshylar jyl basynan beri 7 mıllıon tonnadan astam astyq tasymaldady. 2015-2016 astyq tasymaly naýqany maýsymynda 12 mıllıon tonna astyq tıeldi.

Bul týraly «Qazaqstan temir joly UK» AQ-ynda vıtse-prezıdenti Qanat Alpysbaevtyń tóraǵalyǵymen ótken jańa astyqty tasymaldaý máselesine arnalǵan keńeste málim boldy, dep habarlaıdy «Qazaqstan temir joly» UK» AQ baspasóz qyzmeti.   

   Keńeske memlekettik organdar, «QTJ -Júk tasymaly»  AQ, Azyq túlik korporatsııasy» UK» AQ, «Astyq Trans» AQ, treıderler men Qazaqstannyń astyq naryǵyndaǵy kásiporyndar men mekemeler  ókilderi qatysty.

   Q. Alpysbaev astyq tasymalyn barynsha jınaqy ótkizýdiń mańyzdylyǵyna toqtalyp, kompanııanyń osy baǵytta atqaryp jatqan jumystaryna toqtaldy.

    «Qazaqstandyq astyq Ortalyq Azııa, Taıaý Shyǵys, Reseıge eksportqa shyǵarylýda. Qytaı baǵdaryna astyq shyǵarý kólemi ósip keledi. Bıylǵy jyly QHR-na 200 myń tonnadan astam astyq jóneltildi. Qazaqstandyq astyq vagondarymen, ámbebap konteınerlermen Úrimshi temir jolynyń stansalary arqyly tasymaldaýdy uıymdastyrý josparlanýda»,- deıdi kompanııanyń vıtse-prezıdenti.

  Onyń aıtýynsha, qazirgi tańda Iran baǵdaryna mýltımodaldyq tasymaldaýǵa qolaıly jaǵdaı jasalǵan. Aqtaý portynda jylyna 60 myń tonna astyq qabyldaı alatyn, 1,5 mıllıon tonna astyq óńdeıtin  jańa termınal salyndy. Kompanııa astyq tasymaldaýǵa biryńǵaı tarıf engizip, onyń turaqty bolýyna kepildik etedi.

  Q. Alpysbaev astyq kompanııalaryna júk tıeý men túsirýdiń bastapqy jáne sońǵy operatsııasyna deıin júk tıeý men túsirý, jyljymaly quramdy tıimdi paıdalanýǵa temir jol ınfraqurylymynyń ázir ekendigin atap ótti.

  Bıylǵy jylǵy qyrkúıektiń alǵashqy onkúndiginde Respýblıka aýmaǵynda 9 mıllıon gektardyń, ıaǵnı jalpy eginniń 62 paıyzy jınaldy. Odan 14 mıllıon tonna dán bastyryldy. Qazaqstandyq jańa astyqty tasymaldaýdy júıeli uıymdastyrýǵa  7 myń vagon qajet.