«Qazaqstan temir joly» úshin jańa tarıfter bekitildi

ASTANA. QazAqparat - Qazaqstan Respýblıkasy Ulttyq ekonomıka mınıstrliginiń Tabıǵı monopolııalardy retteý jáne básekelestikti qorǵaý komıteti «Kazaqstan temir joly» ulttyq kompanııasy» AQ-nyń magıstraldyq temir jol jelisiniń qyzmetterine tarıfter bekitýge arnalǵan ótinimin qarady, dep habarlady atalǵan vedomstvonyń baspasóz qyzmetinen.

Ótinimdi qaraý nátıjeleri boıynsha osy kórsetiletin qyzmetterdiń tarıfteri kelesi jylǵa málimdelgen 22,8 % jáne 2017-2020 jyldarǵa 7 % ornyna 2016 jylǵy 1 qańtardan bastap jáne jyl saıyn (2020 jylǵa deıin) ortasha eseppen 4 paıyzǵa ulǵaıady.

QTJ málimdegen tarıf jarııa tyńdaýlarda talqylandy. Sondaı-aq bıznes qaýymdastyqpen birlesip talqylaý ótkizildi. Nátıjesinde 4 paıyzdyq deńgeıinde (ortasha eseppen) bekitilgen ósý «Respýblıkalyq taý-ken jáne taý-ken metallýrgııalyq kásiporyndar qaýymdastyǵy» ZTB jáne «Atameken» ulttyq kásipkerler palatasy qoldady.

Tarıfterdi ózgertýdiń negizgi sebebi 608,6 mlrd. teńge mólsherindegi somada 5 jyldyq ınvestıtsııalyq baǵdarlamany iske asyrý boldy. Osylaısha QTJ jańa tarıfi eń aldymen óz qyzmetterin úzdiksiz jáne qaýipsiz kórsetý úshin jańa quraldardy salýǵa jáne jańǵyrtýǵa ınvestıtsııalardy kózdeıdi. 5 jyl ishinde mynadaı is-sharalar iske asyrylady:

joldyń ústińgi qurylysyn kúrdeli jóndeý;

Almaty-Shý ýchaskesinde ekinshi joldardyń jáne Astana qalasyndaǵy jańa temir jol vokzalynyń birinshi kezektegi qurylysy; tartymdyq shaǵyn stansalardy jańǵyrtý;

Stansalardy jańǵyrtý, razezderdiń, qosymsha parktiń qurylysy;

Poezdar qozǵalysyn aralyq retteý júıelerin salý, TOBJ (talshyqty-optıkalyq baılanys jelisi) jáne basqalar.