«Qazaqstan temir joly» Shýdaǵy poıyz apatyn tekseretin arnaıy komıssııa qurdy

ASTANA. QazAqparat - «Qazaqstan temir joly» ulttyq kompanııasy «Astana-Almaty» baǵytynda qatynaıtyn poıyzdyń apatqa ushyraýyna qatysty resmı málimdeme taratty, dep habarlaıdy QazAqparat tilshisi.

«2018 jyldyń 17 shildesi kúni saǵat 13:45-te «Astana-Almaty» baǵytynda qatynaıtyn №9 poıyzy Saryshaǵan-Shý ýchaskesinde, Jambyl jol bólimshesi Jıdeli ótkelinde apatqa ushyrap, 8 vagon relsten shyǵyp ketti, onyń ekeýi bir búıirine qulaǵan. Oqıǵa saldaryn joıý úshin Shý men Saryshaǵan stansasynyń qalpyna keltirý poıyzdary jolǵa shyqty. Zardap shekkender anyqtalyp jatyr. Relsten shyǵyp ketý sebebin anyqtaý úshin «Qazaqstan temir joly» UK» AQ-nyń arnaıy komıssııasy quryldy. Tergeý amaldary júrgizilip jatyr», - delingen ulttyq kompanııa taratqan aqparatta.