«Qazaqstan temir joly» kompanııasy energııa únemdeý jobalaryna 40 mln dollar jumsamaq

ASTANA. QazAqparat - «Qazaqstan temir joly» AQ Eýropa Damý bankinen alynatyn 40 mln dollardy energııa únemdeý jobalaryna jumsamaq. Búgin Ortalyq kommýnıkatsııalar qyzmetinde «Energııa tıimdilik salasyna strategııalyq ınvestorlar tartý» taqyrybynda ótken baspasóz máslıhatynda «Elektr energetıkasyn damytý jáne energııa únemdeý ınstıtýty» AQ basqarýshy dırektory Álibek Qabylbaı osylaı málim etti.

Basqarýshy dırektordyń sózine qaraǵanda, «Qazaqstan temir joly» ulttyq kompanııasy óziniń energııa únemdeý baǵdarlamasyn jasap, qorǵap shyqqan.

«Ulttyq kompanııa osy arqyly Eýropa Damý bankiniń 40 mln dollardy quraıtyn qarajatyn tarta otyryp, óz salasynda energıtıimdilikti artyratyn jobalardy júzege asyratyn bolady. Bul qarajat negizinen stansalardaǵy jylytý, jaryqpen qamtý nysandaryn jańǵyrtýǵa jumsalady. Keıibir óńirlerde kún sáýlesinen qýat alý qondyrǵylaryn ornatý kózdeledi», - deıdi Á.Qabylbaı.

Onyń aıtýynsha, energııa únemdeý aýdıty arqyly júzege asyrylatyn baǵdarlamalar kompanııanyń básekege qabilettiligin arttyrýǵa oń serpin beredi.

«Tutastaı alǵanda, energııa únemdeý saıasaty Indýstrııalandyrý baǵdarlamasymen qatar júzege asýda. Al energııa únemdeý baǵdarlamasy boıynsha elimizdiń árbir ákimdikteri óziniń óńirlik josparlaryn ázirleýi shart. Qazirshe nátıjeler barshylyq, degenmen atqarylatyn jumystar aýqymy áli de zor. Sonyń ishinde qarjylyq qamtý máselesi ózekti. Sondyqtan da, jańartý jumystaryna, jańa tehonologııalar ákelip, engizýge ınvestorlar tartý mańyzdy, sonyń ishinde energoservıstik naryqty damytý qajet», - dedi Álibek Qabylbaı.