Qazaqstan temir joldarynda joǵary jaılylyqpen jabdyqtalǵan 300 jańa vagon paıda bolady

ASTANA. QazAqparat - Bıyl «Jolaýshylar tasymaly» AQ joǵary jaılylyqpen jabdyqtalǵan 300 jańa vagondy alýdy josparlap otyr. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda atalǵan kompanııanyń basshysy Ermek Tólegenov málim etti.

Onyń sózine qaraǵanda, jyl basynda temir jol tasymalyna tarıfterdiń jeti paıyzǵa artýy kompanııanyń qarjylyq kórsetkishin arttyrýǵa aıtarlyqtaı yqpal etedi. «Osy oraıda biz bıyl jabdyqtalǵan úsh júz jańa vagondy alatyn bolamyz», - dedi E. Tólegenov.

Sonymen qatar ol bul vagondardy alǵannan keıin poıyzdardyń quramy tolyq jasaqtalady. Atap aıtqanda, osy vagondar kondıtsıonerlermen, meıramhanalarmen jáne basqa da qajetti júıelermen jabdyqtalǵan.

Buǵan qosa, «Jolaýshylar tasymaly» AQ jańadan elektropoıyzdardy satyp alýdy kózdep otyr. Olar Astana - Býrabaı, Astana-Qaraǵandy, Astana-Pavlodar aralyǵynda jolaýshylar tasymaldaıdy.