Qazaqstan telearnalary Ázerbaıjanda habar taratatyn bolady

ASTANA. QazAqparat – Qazaqstan telearnalary Ázerbaıjannyń kabeldi operatorlary arqyly habar taratatyn bolady. Bul týraly Ázerbaıjan Prezıdenti Ilham Álıevpen kelissózderden keıingi BAQ ókilderine arnalǵan brıfıngte Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Bizdiń gýmanıtarlyq baılanystarymyzdy tereńdetý de eki eldiń jastary arasyndaǵy baılanystarǵa sep bolady. Biz jastar saıasaty jáne bilim berý salasyndaǵy yntymaqtastyqty damytý boıynsha taraptar qabyldaǵan qadamdy qoldadyq. Beıindi mınıstrlikterge akademııalyq utqyrlyqty qamtamasyz etýge barynsha járdemdesý, birlesken bilim jáne ǵylymı jobalardy uıymdastyrý tapsyryldy», - dedi Qasym-Jomart Toqaev.

Osy oraıda Memleket basshysy Qazaqstan Respýblıkasynyń Ulttyq ǵylym akademııasy men Ázerbaıjan Ulttyq ǵylym akademııasy arasyndaǵy Ǵylymı yntymaqtastyq boıynsha ózara túsinistik týraly memorandýmǵa qol qoıylǵan eske salyp ótti.

«Sondaı-aq kelissózder barysynda Ázerbaıjandyq kabeldi operatorlar jelisinde qazaqstandyq telearnalar habaryn taratý ýaǵdalastyǵyn júzege asyrý mańyzdylyǵy atalyp ótildi», - dedi Prezıdent.