Qazaqstan Tájikstanǵa tek portatıvti ókpeni jasandy jeldetý apparattaryn bermek

NUR-SULTAN. QazAqparat - Qazaqstan Tájikstanǵa portatıvti ókpeni jasandy jeldetý apparattaryn bermek. Bul týraly Ortalyq kommýnıkatsııalar qyzmetindegi brıfıng barysynda QR Densaýlyq saqtaý vıtse-mınıstri Lıýdmıla Bıýrabekova aıtty, dep habarlaıdy QazAqparat tilshisi.

«Qazirgi ýaqytta barlyq el bir-birine kómek kórsetip jatyr. Elimizge de basqa memleketter gýmanıtarlyq kómek berýde. Rasynda da Qazaqstan Úkimeti Tájikstanǵa jyldyń sońyna qaraı portatıvti ókpeni jasandy jeldetý apparaty túrindegi gýmanıtarlyq kómek kórsetý týraly máseleni qarastyrylýda. Bul portatıvti apparat ekendigin atap ótkim keledi. Ol patsıentti jedel járdem kóligimen tasymaldaý úshin qoldanylady», - dedi vıtse-mınıstr BAQ ókilderiniń saýalyna oraı.

Onyń atap ótýinshe, portatıvti ókpeni jasandy jeldetý apparaty elimizde, Aqmola oblysynda shyǵarylady.

«Búginde atalǵan óndirýshi óziniń óndiristik qýatyn arttyryp otyr. Kásiporyn túrkııalyq kompanııamen birge portatıvti ókpeni jasandy jeldetý apparatynan bólek qazirgi ýaqytta bizge asa qajetti bolyp otyrǵan statsıonarlyq ókpeni jasandy jeldeý apparatyn shyǵarýdy josparlaýda. Óndiris taıaý aralyqta jolǵa qoıylady jáne jyldyń sońyna deıin elimizdiń barlyq aýrýhanalaryna qajetti portatıvti jáne statsıonarlyq ókpeni jasandy jeldetý apparattarmen qamtamasyz etedi»,- dedi Lıýdmıla Bıýrabekova.