Qazaqstan Tájikstanǵa ǵaryshtyq baılanys qyzmetterin kórsetetin boldy

NUR-SULTAN. QazAqparat - QR Tsıfrlyq damý, ınnovatsııalar jáne aeroǵarysh ónerkásibi mınıstrligi aeroǵarysh komıtetiniń «Respýblıkalyq ǵaryshtyq baılanys ortalyǵy» AQ jáne «Isatel» JShQ (Tájikstan) «Kazsat-3» ǵarysh apparatynyń transponderlik syıymdylyǵyn usyný boıynsha qyzmet kórsetý shartyna qol qoıdy, dep habarlaıdy QazAqparat.

Qujatqa sáıkes, Tájikstanda qazaqstandyq jerseriktik baılanys resýrstary arqyly elimizdiń alysta ornalasqan eldi-mekenderi úshin baılanys arnalary uıymdastyrylady.

Shartqa «Respýblıkalyq ǵaryshtyq baılanys ortalyǵy» AQ basqarma tóraǵasynyń orynbasary Vasılıı Leonov pen «Isatel» JShQ dırektory Ýmed Tagoev qol qoıdy.

«Isatel» JShQ - «Teleradıokom» AAQ enshiles uıymy jáne Tájikstandaǵy baılanys operatory.

Onyń Dýshanbe qalasynda óziniń teleporty jáne jelilik basqarý stantsııasy bar, eldiń memlekettik organdary men jeke kompanııalary úshin ınternetke qol jetimdilikti qamtamasyz etedi.

Halyqaralyq naryqqa shyǵý – eki baılanys jerseriginen jáne jerústi basqarý keshenderinen turatyn, «Kazsat» ǵarysh júıesin sátti basqaratyn Qazaqstan Respýblıkasynyń ulttyq ǵaryshtyq baılanys operatory «RǴBO» AQ mańyzdy mindetteriniń biri.

Qazaqstannyń jerseriktik baılanys júıesi elimizdiń baılanys qyzmetteri qajettiligin tolyǵymen qamtamasyz etedi, «Respýblıkalyq ǵaryshtyq baılanys ortalyǵy» AQ Qyrǵyz Respýblıkasyna da ǵaryshtyq baılanys ónimderin jetkizedi.

Tsıfrlyq ındýstrııa qyzmetteriniń eksportyn ulǵaıtý – bul mindetti el Prezıdenti Qazaqstan halqyna Joldaýynda memleket ekonomıkasyn damytýdyń quramdas bólikteriniń biri retinde atap ótti.

Ǵaryshtyq baılanys salasyndaǵy jańa halyqaralyq shartqa qol qoıý «Respýblıkalyq ǵaryshtyq baılanys ortalyǵy» AQ ujymynyń kásibı jumysynyń nátıjesi bolyp tabylady jáne Qazaqstan Respýblıkasy men Tájikstan arasyndaǵy yntymaqtastyqtyń jańa damý keleshegin ashady.