Qazaqstan táýligine 1,86 mln barrel munaı óndiretin bolady

NUR-SULTAN. qazAqparat - QR Energetıka mınıstri Qanat Bozymbaev bastaǵan Qazaqstan Respýblıkasynyń delegatsııasy OPEK + elderiniń óndiris kólemin erikti qysqartý týraly kelisimge múshe elderdiń altynshy mınıstrlik kezdesýiniń jumysyna qatysty, dep habarlaıdy QazAqparat Energetıka mınıstrliginiń baspasóz qyzmetine silteme jasap.

Otyrys barysynda qatysýshylar álemdik munaı naryǵyn turaqtandyrýǵa baǵyttalǵan birlesken is-sharalardy talqylady. 2018 jylǵy qarashadaǵy deńgeıge qatysty OPEK+ kelisimin 2019 jylǵy 1 shildeden bastap 9 aıǵa uzartý arqyly munaı óndirýdiń jalpy kólemin táýligine 1,2 mln barrelge azaıtýǵa kelisti. Qazaqstan táýligine 1,86 mln barrel munaı óndiretin bolady.

Sondaı-aq, is-shara sheńberinde mınıstrler OPEK-ke múshe elder men OPEK-ke kirmeıtin memleketter arasyndaǵy yntymaqtastyq týraly Hartııa jobasynyń mátinin kelisti. Bul qujat OPEK + elderi arasyndaǵy yntymaqtastyqty ınstıtýttandyrýǵa múmkindik týdyrady.

Budan buryn Qazaqstan Respýblıkasynyń Prezıdenti Qasym-Jomart Toqaev Saýd Arabııasynyń Koroli Salman ben Abdel Azız Al Saýdpen telefon arqyly sóılesý kezinde Qazaqstan 2019 jyldyń sońyna deıin OPEK+ kelisiminiń qoldanylý merzimin uzartý jónindegi Saýd bastamasyn qoldaıtyny týraly aıtqan edi.

Qazaqstan OPEK elderimen jáne OPEK-ke kirmeıtin memlekettermen álemdik munaı naryǵyn turaqtandyrýǵa jáne munaı ındýstrııasy ınvestorlarynyń senimdiligin qalpyna keltirýge baǵyttalǵan belsendi yntymaqtastyqty júrgizýde. Álemdik munaı naryǵynyń turaqtylyǵyn saqtaý - Qazaqstan Respýblıkasynyń múddelerine saı keledi, sebebi munaı salasy el ekonomıkasynda eleýli rólge ıe.

Esterińizge sala ketsek, 2018 jylǵy jeltoqsanda óndirýdi táýligine 1,86 mln barrelge qysqartý boıynsha mindettemelerdi qabyldaı otyryp, Qazaqstan OPEK+ elderiniń 2019 jyldyń birinshi jarty jyldyǵynda óndirý kólemin qysqartý boıynsha mámileni qoldady.

Osy jyldyń alty aıynyń qorytyndysy boıynsha Qazaqstanda ortasha táýliktik óndirý kólemi 1,79 mln barreldi qurady. Osylaısha, Qazaqstan OPEK + aldyndaǵy óndirýdi táýligine 70 myń barrelge qysqartý boıynsha óz mindettemelerin asyra oryndady.