Qazaqstan taýarlarynyń Serbııaǵa eksporty ulǵaıtylmaq

NUR-SULTAN. QazAqparat – Parlament Senatynyń jalpy otyrysynda palata depýtattary «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Serbııa Respýblıkasy arasyndaǵy erkin saýda týraly kelisimdi ratıfıkatsııalaý týraly» Zańyn qabyldady, dep habarlaıdy QazAqparat tilshisi.

«Qazaqstan, Belarýs jáne Reseıde Serbııa Respýblıkasymen erkin saýda týraly sharttar búgingi tańda qoldanylady. Biraq olar ekijaqty túrde jasalǵan. Alaıda Armenııa men Qyrǵyzstan osyndaı kelisimderdi jasaspady. Osy kelisimmen Eýrazııalyq ekonomıkalyq odaqqa bes múshe memlekettiń Serbııamen birdeı saýda rejımi ornatylady», - dedi QR Saýda jáne ıntegratsııa mınıstri Baqyt Sultanov.

Jańa kelisimde Qazaqstan, Belarýs pen Reseıde bajsyz saýdamen qarastyrylǵan taýarlar tizbesi ulǵaıǵan. Osylaısha, Eýrazııalyq ekonomıkalyq odaq elderi Serbııaǵa irimshik, alkogol ishimdik jáne temeki taýarlaryn bajsyz jetkize alady. Osyǵan deıin bul taýarlarǵa ımporttyq baj salyqtary salynǵan.

Іshki naryqty qorǵaý maqsatynda Eýrazııalyq ekonomıkalyq odaq qus etin, qantty, matalardy, alkogol ishimdikterdi, temekini ákelýge, sondaı-aq kompressorlar men motorly kólik quraldary sııaqty birqatar ónerkásip taýarlaryna ımporttyq baj salyqtaryn qoldanýdy saqtaıdy.

«Jańa kelisim Dúnıejúzilik saýda uıymynyń erejeleri negizinde ázirlengen. Atap aıtqanda, taraptar sanıtarııalyq jáne fıtosanıtarııalyq sharalardy, tehnıkalyq retteý sharalaryn tek halyqaralyq qaǵıdattar negizinde qoldanýǵa kelisti. Sonymen qatar zııatkerlik menshik obektilerin qorǵaýǵa kepildik berýge ýaǵdalasty. Osylaısha, Serbııa Dúnıejúzilik saýda uıymyna múshe bolmasa da, halyqaralyq uıymnyń erejelerin oryndaý boıynsha mindettemelerdi ózine qabyldaıdy. Osy kelisimdi iske asyrý Eýrazııalyq ekonomıkalyq odaqqa múshe memleketterde óndiriletin taýarlardy ótkizý naryǵyn keńeıtýge múmkindik beredi. Atap aıtqanda, qazaqstandyq taýarlardyń Serbııaǵa eksportyn ulǵaıtý áleýeti 250 mln AQSh dollaryn quraıdy», - dedi mınıstr.

Osy oraıda hımııa jáne munaı-hımııa, mashına jasaý ári metallýrgııa, tamaq ónerkásibi salalarynyń taýarlary, qurylys materıaldary eskerilgen.

«Zań jobasyn iske asyrý respýblıkalyq bıýdjetten qarjy qarajatyn bólýdi talap etpeıdi jáne teris áleýmettik-ekonomıkalyq jáne quqyqtyq saldarlarǵa ákep soqtyrmaıdy», - dedi Baqyt Sultanov.