Qazaqstan taýarlarynyń eksporty 59 paıyzǵa ósti - Álıhan Smaıylov

NUR-SULTAN. QazAqparat – Qazaqstanda makroekonomıkalyq kórsetkishtiń oń serpini qalyptasyp otyr. Bul týraly búgin Úkimettiń keńeıtilgen otyrysynda І jartyjyldyqtaǵy áleýmettik-ekonomıkalyq damý qorytyndysyn talqylaý kezinde Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Álemde qarqyn alyp kele jatqan geosaıası shıelenis halyqaralyq óndiristik, kólik ári logıstıkalyq tizbekterdegi alshaqtyqty kúsheıtip otyr. Energııa resýrstary men azyq-túlik taýarlaryna baǵanyń jappaı ósýi baıqalýda. Kóptegen elderde ınflıatsııa rekordtyq deńgeıge jetti. Mysaly, AQSh-ta jáne Eýropalyq odaqta shamamen 9 paıyzdy qurady», - dedi Á.Smaıylov.

Onyń aıtýynsha, Halyqaralyq valıýta qorynyń 2022 jyly álemdik jalpy ishki ónimniń ósýi boıynsha boljamy 3,6 paıyzǵa deıin tómendep, qaıta qaraldy.

Elimizdiń makroekonomıkalyq kórsetkishi oń nátıjeni kórsetip otyrǵanyna toqtalǵan Úkimet basshysy: «Bıylǵy qańtar-maýsym aralyǵynda Jalpy ishki ónimniń ósimi 3,4 paıyzdy qurady. Taýar óndirisi 4,1 paıyzǵa, qyzmet kórsetý salasy 2,1 paıyzǵa ósti. Óńdeý ónerkásibinde (+5,8%), qurylys (+9,2%), saýda men kólik salalarynda (+6,2%) ósimniń joǵary qarqyny boldy», - dedi.

Onyń sózine qaraǵanda, osy jylǵy qańtar-mamyr aralyǵyndaǵy syrtqy saýda taýar aınalymy 41 paıyzdy, 51 mlrd AQSh dollaryn qurady.

«Eksport 59 paıyzǵa, onyń ishinde óńdelgen taýar eksporty 35 paıyzǵa ósti. Jalpy, oń saýda balansy 2,6 esege artyp, 17,1 mlrd AQSh dollaryn qurady. Negizgi kapıtalǵa salynǵan ınvestıtsııalar 2,6 paıyzǵa ósti», - dedi Á. Smaıylov.