Qazaqstan taýarlaryn Aýǵanstan arqyly Pákistanǵa jóneltý baǵdaryn damytpaq

ASTANA. QazAqparat – Qazaqstan óz taýarlaryn Aýǵanstan aýmaǵy arqyly Pákistan men Úndistanǵa jóneltpek. Bul týraly elordada ótip jatqan Qazaqstan men Aýǵanstan bıznes-forýmynda Premer-Mınıstrdiń orynbasary – saýda jáne ıntegratsııa mınıstri Serik Jumanǵarın málim etti, dep habarlaıdy QazAqparat tilshisi.

«Qazirgi kezde Aýǵanstan Qazaqstan úshin saýda baǵytynda Pákistan men Úndistanǵa aparatyn Ortalyq Azııanyń kólik dálizi sanalady. Biz Pákistannyń iri NLC (National Logistics Cell) logıstıkalyq kompanııasymen kelissózder júrgizdik, ol aýǵan kompanııalarymen de tyǵyz qarym-qatynasta jumys istep jatyr», - dedi S. Jumanǵarın.

Onyń aıtýynsha, Qazaqstan «Mazarı-Sharıf-Kabýl-Peshavar» temirjol kólik dálizin salý bastamasyn joǵary baǵalap otyr. Bul Ortalyq Azııa elderiniń Ońtústik Azııa, Taıaý Shyǵys elderimen úzdiksiz óńiraralyq yntymaqtastyǵyn qamtamasyz etýge múmkindik beredi.

«Bul baǵyt saýda-ekonomıkalyq qarym-qatynas qarqynyna tyń serpin beredi», - dedi mınıstr.

Budan buryn habarlanǵandaı, bıyl Qazaqstan Pákistanǵa jańa baǵdar arqyly birneshe júk kóligin jóneltti.