Qazaqstan taýarlary Iran, Vetnam jáne Serbııa naryǵyna shyqty

NUR-SULTAN. QazAqparat – Qazaqstan taýarlary Iran, Vetnam jáne Serbııa naryǵyna shyqty. Bul týraly QR Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«Qazaqstandyq taýarlardy ótkizetin naryqtardy keńeıtý jáne qolaıly jaǵdaı jasaý úshin Iranmen, Vetnammen jáne Serbııamen erkin saýda aımaǵy týraly kelisim jasaldy. Bul elder qazirdiń ózinde naryqtaryna qazaqstandyq taýarlardyń barynsha jeńildetilgen sharttarmen kelýi úshin múmkindikter usynyp otyr», - dedi mınıstr Senatta ótken Úkimet saǵatynda.

Onyń atap ótýinshe, Sıngapýrmen taýarlar bóligine qatysty kelissózder aıaqtalyp, qyzmetterge qatysty kelissózder aıaqtalýǵa jaqyn qaldy.

«Eksport áleýeti 800 mln dollardan asyp túsetin Izraıl, Mysyr jáne Úndistanmen de kelissózder júrgizilip jatyr», - dedi Baqyt Sultanov.