Qazaqstan tarıhynyń kóp tomdyǵy ázirlenip jatyr

ULYTAÝ. QazAqparat – Tarıhymyz Táýelsiz eldiń kózqarasymen jazylýy kerek. Bul týraly Ulytaý oblysynda ótip jatqan Ulttyq quryltaıdyń otyrysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Men byltyr elimizdiń akademııalyq úlgidegi jańa tarıhyn jazý týraly tapsyrma berdim. Qazir Qazaqstan tarıhynyń kóp tomdyǵy ázirlenip jatyr. Belgili ǵalymdarymyz jumylyp, osy mańyzdy iske atsalysýda. Men ózim de bul jumysqa úlesimdi qosamyn. Ony kelesi jyldyń ortasynda túbegeıli aıaqtaý kerek. Degenmen, másele ýaqytta emes, sapada», - dedi Qasym-Jomart Toqaev.

Osy oraıda Prezıdent tıisti vedomstvoǵa tapsyrma berdi.

«Tarıhymyz júıeli, shynaıy, eń bastysy, Táýelsiz eldiń kózqarasymen jazylýy kerek. Ǵylym jáne joǵary bilim mınıstrligine muny aıryqsha qadaǵalaýdy tapsyramyn. Qajet bolsa, shetel ǵalymdaryn da tartýǵa bolady», - dedi Memleket basshysy.

«Biz tarıhtan taǵylym ala bilgen halyqpyz. Búgin qaıta jalǵasyn tapqan quryltaıdy tól tarıhymyzǵa taǵzym dep aıtýǵa bolady. Osy quryltaı da erteń ult shejiresiniń bir belesine aınalatyny anyq. Eldiń tarıhı jadyn jańǵyrtý úshin úılesimdi saıasattyń bolýy erekshe mańyzdy. Osy oraıda biz el damýynyń jańa basymdyqtaryn belgilep alýymyz kerek», - dedi Qasym-Jomart Toqaev.

Budan buryn habarlanǵandaı, Prezıdent bir kezderi umytylyp ketken ult perzentteriniń esimin qaıta jańǵyrtý kerek ekenin atap ótti.