Qazaqstan tarıhynda alǵash ret volfram óńdeıtin zaýyt ashyldy

<p>ASTANA. KAZINFORM &mdash; Almaty oblysynda volframdy qaıta óńdeý boıynsha Qazaqstandaǵy alǵashqy zaýyt ashyldy. Bul otandyq taý-ken óndirisi úshin tarıhı oqıǵa, ol elimizdiń álemdik sırek metaldar naryǵyndaǵy pozıtsııasyn nyǵaıtady. Bul týraly QR Ónerkásip jáne qurylys mınıstrliginiń baspasóz qyzmeti málim etti.&nbsp;</p>

«Jobanyń quny 300 mln dollardy quraıdy jáne halyqaralyq ekologııalyq jáne óndiristik standarttardy eskere otyryp júzege asyryldy. Zaýyt jergilikti mamandar úshin 1000-ǵa deıin jumys ornyn qamtamasyz etedi jáne jobalyq qýatyna shyqqanda jylyna 3,3 mln tonna rýdy qaıta óńdep, volfram kontsentratynyń 65% úlesin shyǵarady», — delingen vedomstvo habarlamasynda.

Ashylý sátinde negizgi obektilerdiń daıyndyǵy mynadaı boldy:

• Shlam saqtaý oryndary — 60%
• Taý-ken baıytý fabrıkasy — 60%
• Syrtqy sý tartý obektileri — 85%
• Syrtqy elektrmen jabdyqtaý — 100% (110 kV jelisine qosyldy)
• Іshki elektrmen jabdyqtaý — 90%

Foto: Ónerkásip jáne qurylys mınıstrliginiń baspasóz qyzmeti

Jobany TOO «Aral Kegen» basqarady, ol halyqaralyq holdıng Jiaxin International Resources Investment Ltd. quramyna kiredi, oǵan Jiangxi Copper Corporation, China Railway Construction Company, China Civil Engineering Construction Company jáne Ever Trillion International Singapore PTE LTD kompanııalary qosylǵan.

Aldaǵy josparlar volfram mólsherin 88,5%-ǵa deıin jetkizý jáne joǵary tazalyqtaǵy volfram karbıdin shyǵarý úshin tereń qaıta óńdeý keshenin salýdy qamtıdy. Bul kezeńge arnalǵan ınvestıtsııa kólemi 150 mln dollar bolady.

Zaýyttyń ashylýy Qazaqstannyń taý-ken ónerkásibiniń damýynyń jańa kezeńin bildiredi jáne eldiń tabıǵı resýrstardy tıimdi jáne ratsıonaldy paıdalanýǵa umtylysyn kórsetedi.