El tarıhynda alǵash ret balýan qyzdar Olımpıadadan tys qaldy

<p>YSTANBUL. KAZINFORM &ndash; Qazaqstandyq balýan qyzdar úshin Túrkııanyń Ystanbul qalasynda ótip jatqan kúres túrlerinen sońǵy Olımpıadaǵa irikteý týrnıri aıaqtaldy.</p>

Ókinishke qaraı. burymdy balýandarymyz ekinshi ret lıtsenzııalyq týrnırde jappaı utylyp qaldy.

Osylaısha táýelsiz Qazaqstan tarıhynda tuńǵysh ret balýan qyzdarymyz olımpıada oıyndaryna qatysý múmkindiginen aıyrylyp otyr.

Osyǵan deıin Qyrǵyzstan astanasy Bishkek qalasynda ótken Azııa aımaqtyq irikteý saıysynda da qyzdarymyz jartylaı fınaldan ary asa almasa, Túrkııada ótken álemdik irikteý synynda shırek fınaldan shyǵa almady.

Otandastarymyzdy jeńgen ózge balýan qyzdar da jarty joldan jarystaryn aıaqtap, jubanysh beldesýi de buıyrmady.

Eger olar fınalǵa deıin jetkende jerlesterimiz kishi fınalda qola medalǵa talasýǵa múmkindik týar edi.

Osylaısha, Parıj Olımpıadasynda áıelder kúresinen eshkim el namysyn qorǵamaıtyn boldy.

Aıta keteıik, Ystanbulda ótip jatqan sońǵy lıtsenzııalyq týrnırde 50 kelide Laýra Ǵanıqyzy, 53 kelide Marına Sedneva, 57 kelide Laýra Almaǵanbetova, 62 kelide Irına Kýznetsova, 68 kelide Elena Shalygına jáne 76 keli salmaqta Elmıra Syzdyqova synǵa tústi.

Esterińizge sala keteıik, osyǵan deıin Qazaqstan  aýyr atletteriniń de alǵash ret Olımpıadadan tys qalǵanyn jazǵan edik.