Qazaqstan tarapynan ıntegratsııalyq protsesterdi tejeý týraly sóz bolýy múmkin emes - Toqaev
«Qazaqstan ıntegratsııany damytýǵa múddeli ekenin taǵy atap ótemin. Qazaqstan tarapynan ıntegratsııalyq protsesterdi tejeý týraly sóz bolýy múmkin emes. Qazaqstan, kerisinshe, EAEO týraly shartqa tolyq saı keletin ekonomıkalyq ıntegratsııa protsesin jetildirý jáne ońtaılandyrý úshin barlyq kúsh-jigerin jumsaıdy. Bizdiń halyqtarymyz, árıne, Qazaqstan halqy da, bizdiń kásipkerlerimiz de mundaı ıntegratsııanyń paıdasy men nátıjesin kórýi tıis. Degenmen kózdelgen kóptegen ıntegratsııalyq baǵyt boıynsha biz áli de «kibirtiktep» turmyz. Mysaly, Odaqtyń tsıfrlyq kún tártibindegi jumystardyń nátıjesi kórinbeıdi. Qazaqstan bul baǵytta aıtarlyqtaı alǵa jyljydy. Búginde biz tsıfrlandyrylǵan otyz memlekettiń qataryna kiremiz», - dedi QR Prezıdenti.
Qasym-Jomart Toqaev elimizde memlekettik qyzmetterdiń 90 paıyzdan astamy elektrondy formatta kórsetiletindigin atap ótti.
«ІT tehnologııalar men ınnovatsııalardyń básekege qabiletin arttyrý úshin zańnamalyq negizder jasaldy. IT startaptarynyń halyqaralyq tehnoparki tabysty jumys isteıdi. Krıptoındýstrııa damyp, tsıfrlyq teńge engizilip jatyr. Osynyń bárin ıntegratsııany damytýǵa, eýrazııalyq aýqymdaǵy jobalardy jasaýǵa paıdalanýymyz kerek dep esepteımin. Bul júzege asyrýǵa bolatyn mindet. Munyń ústine Reseı, Belarýs, Armenınyń mundaı salalalarda tarıhı turǵyda aıtarlyqtaı tájirıbesi bar. Biz Odaqqa múshe elderdi osy baǵyttaǵy jumysty jandandyrýǵa shaqyramyz», - dedi Memleket basshysy.