Qazaqstan «Talıbandy» tyıym salynǵan qozǵalystar tiziminen alyp tastaı ma

ASTANA. QazAqparat – Elimizde «Talıban» qozǵalysyn tyıym salynǵan uıymdar tiziminen alyp tastaý máselesi kún tártibinde turǵan joq. Bul týraly Syrtqy ister mınıstriniń orynbasary Qanat Týmysh málim etti, dep habarlaıdy QazAqparat tilshisi.

«Bul máseleni halyqaralyq qoǵamdastyq, bizdiń seriktesterimiz, áriptesterimiz úılestiredi. Ázirshe qazirgi ýaqytta tıisti keńester ótkizip jatyrmyz jáne ýaq-ýaq aqparatty jańartyp otyramyz», - dedi mınıstr orynbasary elordada ótken brıfıng barysynda.

Onyń atap ótýinshe, aldaǵy ýaqytta Astanada ótetin Qazaqstan-Aýǵanstan bıznes forýmyna álem elderiniń sanktsııa tizimine enbegen qonaqtar keledi.

Sondyqtan olarǵa qandaı da bir shekteý sharalary qoldanylmaıdy. Buǵan qosa, forýmǵa kelýshilerdiń basym bóligi - iskerlik orta ókilderi, ıaǵnı qarapaıym adamdar.

«Sondaı-aq «Talıban» qozǵalysy AQSh, Ulybrıtanııa syndy batystyń iri elderiniń terrorıstik uıymdarǵa qatysty ulttyq tizimine kirmeıdi. Bul atalǵan elderge «Talıbanmen» túrli deńgeıde baılanys jasaýǵa múmkindik beredi. «Talıban» qozǵalysy ókilderimen kelissóz júrgizilip jatqan Doha alańy bárine belgili. Sondyqtan bul máselege zań turǵysynan kelýimiz kerek. Demek, biz qandaı da bir halyqaralyq normany buzyp otyrǵan joqpyz», - dedi Qanat Týmysh.