Qazaqstan talanttarǵa múmkindik bere bilýi kerek - Imanbek Zeıkenov

ASTANA. QazAqparat – Grammy ıegeri Imanbek Zeıkenov Astanada ótip jatqan Strategııalyq bastamalar forýmyna onlaın rejımde qatysyp, Qazaqstannyń bolashaǵy týraly pikir bildirdi, dep habarlaıdy QazAqparat tilshisi.

«Men birneshe elde jumys istep júrmin. Sol elderden Qazaqstanǵa oralǵanda únemi bir ózgeristerdiń bolyp jatqanyn kóremin. Bul meni shyn máninde qýantady. Men Qazaqstannyń úni jaqsy maǵynasynda qatty shyǵýy kerek dep oılaımyn. Elimizdi búkil álemde tanyp, qurmettegenin, Qazaqstandy beıbitshilik ornatýshy retinde tanyǵanyn qalaımyn», - dedi mýzykant.

Onyń paıymynsha, Qazaqstannyń óńirlerinde qoldaý tappaı júrgen talantty jastar kóp.

«Qazaqstan aldaǵy 7 jylda qalaı ózgerýi kerek degenge kelsek, ol múmkindikter bere bilýi qajet. Óıtkeni, meniń baıqaýymsha, óńirlerde talanattar óte kóp. Bul – shyndyq. Úkimetimiz osy talanttardyń damýyna qandaı da bir sheshim qabyldaýy kerek. Bizde Google-de, Facebook-te jumys istep júrgen aqyldy jastar óte kóp. Olar týraly kóp estidim jáne oqydym da. Meniń kezinde birge oqyǵan, keıin ІT salasynda bilimin jetildirip, jaqsy aqsha taýyp júrgen dostarym bar. Qazaqstandyqtar ІT tilinde jaqsy oılaı biledi. Bizdiń ІT mamandar tabysy bir mıllıard dollardan asatyn «unicorn» komapnıalar qura alady dep úmittenemin. Aldaǵy 7 jylda Qazaqstan biz ǵana qaıta oralǵymyz kelip turatyn el emes, sheteldikter de bir baryp kórýdi armandaıtyn, meken etýdi qalaıtyn elge aınalǵanyn qalaımyn», -dedi Imanbek Zeıkenov.

Ashyq kózderden alynǵan foto