Qazaqstan taǵamdyq jumyrtqa men qus etin óndirýdi qalaı ulǵaıtpaq?
2023 jyldyń 11 aıynda 4 919,9 mln dana jumyrtqa (98%) óndirilip, 186,6 mln dana jumyrtqa eksporttaldy (RF 2 mln 600 myń, Aýǵanstan 114 mln, Qyrǵyzstan 70 mln). Al, sol aralyqta Qazaqstanǵa 264,1 mln dana jumyrtqa ımporttaldy.
"Búginde elimizde jumyrtqa baǵytyndaǵy 34 jáne et baǵytyndaǵy 31 qus fabrıkasy jumys isteıdi. Jyl saıyn olar 5 mlrd dana taýyq jumyrtqasyn óndiredi.
Jumyrtqa baǵytyndaǵy qus fabrıkalary joq óńirlerde (ShQO, Mańǵystaý oblysy, Abaı jáne Ulytaý oblystary) otandyq óndiristi jumyrtqamen qamtamasyz etýdi arttyrý úshin qýattylyǵy jylyna 802 mln dana jumyrtqa óndiretin 10 ınvestıtsııalyq jobany iske asyrý josparlanýda. Bul úshin mınıstrlik «Investıtsııalyq sýbsıdııalaý erejesine» tıisti ózgerister engizýdi josparlap otyr.
2023 jyldyń 1 qańtarynan bastap bir danasy 3 teńge normatıvimen taǵamdyq jumyrtqa óndirisiniń ózindik qunyn tómendetýge beriletin sýbsıdııalar alynyp tastaldy. Osyǵan qaramastan, Azyq-túlik korporatsııasy 2022 jyly qus fabrıkalaryna 126,7 myń tonna jemdik astyqty QQS qosqanda tonnasyna 117 myń teńge baǵamen, ıaǵnı naryq baǵasynan 30 myń teńgege arzan satty", - delingen vedomstvo dereginde.
Memleket bir basqa 60 teńge normatıvimen jumyrtqa baǵytyndaǵy sońǵy nysandaǵy táýliktik balapandy satyp alýdy sýbsıdııalaıdy. 2023 jyly taǵamdyq jumyrtqa óndirisiniń qunyn arzandatýdy sýbsıdııalaýǵa 1,2 mlrd teńge somada, bereshek óteldi. Sondaı-aq táýliktik balapandy satyp alýǵa 476,7 mln teńge kóleminde sýbsıdııalar bólindi.
Al, qus etiniń ımporty ótken jyly 2022 jylmen salystyrǵanda 25 myń tonnaǵa jýyq azaıdy. 2023 jyldyń qorytyndysy boıynsha 328,6 myń tonna soıys salmaǵyndaǵy qus eti óndirildi (2022 jyly - 288,7 myń tonna). Otandyq qus fabrıkalary ishki naryqqa ónimniń 74% -yn jetkizdi.
2023 jyldyń 11 aıynda eksportqa 28,2 myń tonna ónim jóneltildi. Eksporttyń negizgi baǵyttary - RF (19 myń tonna), Qyrǵyzstan (7,5 myń tonna), Belarýs (653 tonna), Ózbekstan (611,6 tonna).
"Bıyl etti qus sharýashylyǵyn sýbsıdııalaýǵa 21,7 mlrd teńge, onyń ishinde qus eti óndirisiniń qunyn arzandatýǵa - 21,4 mlrd teńge jáne asyl tuqymdy táýliktik balapandy satyp alýǵa - 336,8 mln teńge baǵyttaldy.
Aldaǵy 3 jylda jalpy qýattylyǵy 210 myń tonna qus etin óndiretin 29 jobany iske qosý josparlanýda. Bul 2027 jylǵa qaraı ımportqa táýeldilikti tolyq jabýǵa múmkindik beredi. Jobalardy iske asyrý Úlken joba (SQO-nyń oń tájirıbesin kóbeıtý) sheńberinde josparlanyp otyr", - dep málimdedi AShM.