Qazaqstan stýdentteri Amazon kompanııasynda jumys isteýge múmkindik aldy
2022 jyldyń sońynda Ǵylym jáne joǵary bilim mınıstrligi men Amazon kompanııasy arasynda memorandýmǵa qol qoıylǵan bolatyn.
Ekijaqty kelisim aıasynda Qazaqstanda College Contributor Initiative pılottyq baǵdarlamasy iske qosyldy.
Endi elimizdiń JOO stýdentteri Amazon kompanııasynyń halyqaralyq aýdıtorııasy arasynda birinshi bolyp OpenSearch Amazon ashyq bastapqy kody bar jobada jumys isteýge qatysady.
Elimizdegi tehnıkalyq ýnıversıtetterde oqıtyn 100-den astam úzdik stýdent Amazon korporatsııasynyń aldyńǵy qatarly jobasyna tikeleı qatysýǵa múmkindik alady.
Aqparattyq tehnologııalar mamandyǵynda bilim alatyn qazaqstandyq stýdentter úsh aı boıy Amazon kompanııasy mamandarynyń jetekshiligimen OpenSearch boıynsha tájirıbelik jumys júrgizip, derekter repozıtorııleriniń keń baǵyty boıynsha bastapqy kodqa ózgerister men jaqsartýlar engizedi.
Baǵdarlama stýdentterdiń óz portfolıosyna halyqaralyq jobalarda jumys isteý boıynsha trek rekordyn (basqarý nátıjelerin) jasaýǵa, Amazon kompanııasynyń mamandarymen tıimdi baılanys ornatýǵa múmkindik beredi.
OpenSearch jobasy aıasynda stýdentterge óz jumystaryna tolyq taldaý túrindegi esep beriledi.
Sondaı-aq, korporatsııa tálimgerlerinen usynymdar men pikirler tyńdap, bolashaqta Amazon kompanııasynda taǵylymdamadan ótýge, tipti jumysqa ornalasýǵa múmkindik alady.
Budan bólek, Amazon kompanııasy OpenSearch Amazon pılottyq jobasyn Qazaqstanda iske asyrý arqyly basqa elderden stýdentter tartyp, órisin keńeıtýge nıetti.