Qazaqstan sportshylarynyń Ýnıversıadadaǵy jarys kestesi jarııalandy

ASTANA. QazAqparat - Qytaıdyń Chendý qalasynda ótetin Dúnıejúzilik stýdenttik oıyndaryna qatysatyn Qazaqstan sportshylarynyń jarys kestesi shyqty, dep habarlaıdy QazAqparat.

QR Ǵylym jáne joǵary bilim mınıstrliginiń baspasóz qyzmeti málim etkendeı ýnıversıtet sportshylarynyń halyqaralyq federatsııasynyń (FISU) XXXI Dúnıejúzilik stýdenttik oıyndary Qytaıdyń ońtústik-batysyndaǵy Sychýan provıntsııasynyń Chendý qalasynda 28 shilde men 8 tamyz aralyǵynda ótedi.

Qazaqstan atynan 11 sport túrinen 93 sportshy qatysady (sadaq atý; oq atý; jeńil atletıka; sporttyq gımnastıka; dzıýdo; kórkem gımnastıka; ústel tennısi; taekvondo; ý-shý; júzý; semserlesý). El quramasy elimizdiń 26 joǵary oqý ornynyń stýdentterinen jasaqtalǵan.

28 shildede Ýnıversıadanyń ashylý saltanaty ótedi, al 27 shildede qazaqstandyqtar sadaq atýdan alǵashqy jarystarda óner kórsetedi.

Jarys 8 tamyzǵa deıin jalǵasady, onda 18 sport túrinen 269 medal jıyntyǵy oınalady. Álemniń túkpir-túkpirinen on myńnan astam sportshy marapattar úshin kúresedi.

Ýnıversıada jarystary «Armandar Chendýde shyndyqqa aınalady» uranymen ótedi. Ýnıversıadanyń boıtumary 2019 jyldyń 30 jeltoqsanynda tanystyrylǵan «Ronq Bao» pandasy boldy.

Esterińizge sala keteıik, 27 shildede saǵat 20:00-de (Chendý qalasynyń ýaqyty boıynsha) sport qalashyǵynda memlekettik týdy kóterý rásimi ótedi.

Buǵan deıin habarlaǵanymyzdaı, Dúnıejúzilik jazǵy Ýnıversıadanyń ashylý saltanatynda Qazaqstan týyn dzıýdoshy Qablan Nursultan kóterip shyǵady.