Qazaqstan - Soltústik Irlandııa matchy EKSPO sahnasynda tikeleı kórsetiledi

ASTANA. QazAqparat – EKSPO alańynda «Fýtbol joly» sport festıvali ótedi, dep habarlaıdy QazAqparat Astana ákimdiginiń resmı saıtyna silteme jasap.

Sport festıvali 10 qyrkúıekte saǵat 14.00-den 22.00-ge deıin ótedi.

Іs-shara aıasynda EKSPO aldyndaǵy alańnyń jazǵy sahnasynda Qazaqstan men Soltústik Irlandııa quramalary arasyndaǵy Eýro-2024 irikteý kezeńiniń tikeleı kórsetilimi ótedi.

Sondaı-aq, jınalǵandardyń aldynda M'Dee óner kórsetedi.

Esterińizge sala keteıik, Qazaqstan men Soltústik Irlandııa matchy «Astana Arena» stadıonynda ótedi.

Jankúıerlerge yńǵaıly bolý úshin stadıonǵa arnaıy avtobýstar qatynaıdy.

Matchqa baılanysty joldardyń bir bóligi jabylady, sol sebepti erterek shyǵyp, qozǵalys baǵytyn aldyn ala josparlaýy qajet.

Sonymen qatar oıyndy tikeleı efırde «Qazsport» telearnasynan kórýge bolady.

Qazaqstan quramasynyń bas bapkeri Magomed Adıev match aldyndaǵy baspasóz máslıhatynda Soltústik Irlandııaǵa qarsy oıynǵa daıyndyq týraly aıtty. Aıtýynsha, el quramasy sapynda ózgerister bolady.