Qazaqstan Sırııa máselesin retteýge óz úlesin qosýǵa daıyn - Kamaldınov

ASTANA. QazAqparat - Qazaqstan BUU Qaýipsizdik keńesiniń turaqty emes múshesi retinde óńirlik jáne halyqaralyq qaýipsizdikke qatysty máselelerdi sheshýge kúsh salady. Bul týraly búgin elordada ótip sırııalyq retteý jónindegi Astana protsesiniń jalpy otyrysy jumysyn ashqan QR Syrtqy ister mınıstriniń orynbasary Aqylbek Kamaldınov aıtty, dep habarlaıdy QazAqparat.

«Prezıdent Nazarbaevtyń bitimgershilik bastamalary, sonymen qatar búkil álemdegi elder arasyndaǵy janjaldardy sheshý men shıelenisterdi qysqartýdaǵy úlesi halyqaralyq deńgeıde moıyndalǵan. Qazaqstan búgingi sharanyń barynsha jemisti bolaryna shynaıy úmit artady. Biz progress bolatyndyǵyna jáne soǵysty toqtatý rejiminiń júzege asyrylatyndyǵyna úmittenemiz. Bul óńirdegi ahýaldy turaqtandyrýǵa óz úlesin qosar edi», - dedi Kamaldınov.

Sonymen qatar ol Qazaqstan 2017-2018 jyldary BUU Qaýipsizdik keńesiniń turaqty emes múshesi retinde óńirlik jáne halyqaralyq qaýipsizdikke qatysty máselelerdi sheshýge bar kúshin jumsaıtyndyǵyn basa aıtty.

«Bul turǵyda biz Sırııa boıynsha máselelerdi retteýge de óz úlesimizdi qosýǵa  daıynbyz», - dedi mınıstrdiń orynbasary.