Qazaqstan Sırııa kelissózderin ótkizýge daıyndalýda

ASTANA. QazAqparat - Qazaqstan mamyr aıynda elordada ótetin Sırııa boıynsha kelissózderge daıyndyq ústinde. Bul týraly  búgin Úkimettiń selektorlyq rejimdegi otyrysynan keıin BAQ ókilderiniń saýalyna jaýap bergen elimizdiń Syrtqy ister mınıstri Qaırat Ábdirahmanov málim etti, dep habarlaıdy QazAqparat.

«Biz sırııalyq janjaldy beıbit jolmen retteýge múddelik tanytatyn barlyq tarapty Astana protsesin, eń aldymen BUU qamqorlyǵymen ótetin Jeneva protsesin qoldaýǵa shaqyramyz», - dep atap ótti ol.

Qazaqstan SІM basshysy atalǵan janjalǵa qatysy bar barlyq taraptar bul protsesti ózderiniń múmkinshilikterine qaraı tolyqtaı qoldaıtyndyǵynan úmitti ekendigin jetkizdi. Sondaı-aq ol Qazaqstannyń Astana protsessine soǵys is-qımyldaryn toqtatýǵa múddelilik tanytatyn barlyq taraptardyń qatysqandyǵyna múddeli ekendigin basa aıtty.

«Baıqaýshy retinde buǵan deıin qatysqandar ǵana qatysýy shart emes, bizdiń kózqarasymyzsha, bul sheńberdi ulǵaıtý qajet-aq. Degenmen sońǵy sóz kepilger elderde (Reseı, Iran, Túrkııa - red.)», - dedi Ábdirahmanov.

Aıta keteıik, buǵan  deıin habarlaǵanymyzdaı, Sırııa boıynsha halyqaralyq kezdesý 3-4 mamyr kúnderi  elordada ótedi.