Qazaqstan ShYU-nyń týrızmdi damytý týraly kelisimine qosylady
10:29, 31 Naýryz 2023
ASTANA. QazAqparat – Qazaqstan Shanhaı Yntymaqtastyq Uıymynyń týrızm salasyndaǵy yntymaqtastyqty damytý týraly kelisimine qosylýy múmkin. Kelisim jobasy «Ashyq» NQA portalynda jarııalandy, dep habarlaıdy QazAqparat tilshisi.
«Qazaqstan 2022 jylǵy 16 qyrkúıekte Samarqandta jasalǵan Shanhaı Yntymaqtastyq Uıymyna múshe memleketterdiń úkimetteri arasyndaǵy týrızm salasyndaǵy yntymaqtastyqty damytý týraly kelisimge qosylsyn. Osy qaýly qol qoıylǵan kúninen bastap qoldanysqa engiziledi», - delingen qujatta.
Kelisim jobasy 13 sáýirge deıin ashyq talqylaýda bolady. Keıin qujat qol qoıý úshin Premer-Mınıstrge joldanady.
Eske salaıyq, bul ýaqytqa deıin Almaty qalasyn 2023-2024 jyldary ShYU-nyń mádenı jáne týrızm astanasy retinde bekitý usynylǵanyn jazyp edik.
Sonymen qosa, bıyl shildeden 2024 jyldyń shildesine deıin Qazaqstan Shanhaı Yntymaqtastyq Uıymyna tóraǵalyq etedi.