Qazaqstan Shyǵys Eýropa men Ortalyq Azııa ýnıversıtetteri reıtıngisiniń alǵashqy úshtigine endi
«Elimizdegi 25 ýnıversıtet Quacquarelli Symonds (QS) reıtıngi boıynsha Shyǵys Eýropa men Ortalyq Azııanyń úzdik 300 ýnıversıteti qataryna kirdi. Brıtan QS konsaltıng agenttigi jyl saıyn álemniń oqý oryndaryna tereń zertteý júrgizedi», dep jazdy BǴM Feısbýktegi paraqshasynda.
300 úzdik ýnıversıtet qatarynda ál-Farabı atyndaǵy QazUÝ, L. Gýmılev atyndaǵy EUÝ, Q. Sátpaev atyndaǵy QazUITÝ, QBTÝ, Qazaq agrotehnıkalyq ýnıversıteti, M.Áýezov atyndaǵy OQMÝ, Abaı atyndaǵy QazUPÝ jáne taǵy basqalar bar.
Bilim salasy boıynsha mamandanǵan agenttik 26 eldiń joǵary oqý oryndarynyń qyzmetin zerttep, saralaǵan. QS reıtıngi negizgi 6 kórsetkishke súıenedi.
Olar: joǵary oqý ornynyń akademııalyq ortadaǵy bedeli, jumys berýshilerdiń pikiri men túlekterdiń mánsap joly, múmkindigi, oqytýshylar men stýdentter sanynyń ara qatynasy, bir oqytýshyǵa shaqqandaǵy ındeks jarııalanymdary, shet eldik stýdentter men oqytýshylar sany. Munymen qatar zertteýde kóp ulttylyq, materıaldy-tehnıkalyq jaǵdaı, ýnıversıtettiń áleýmettik jaýapkershiligi, jańashyldyq, sport, óner men mádenıetke kóńil bólý, qashyqtan oqytý jaıy sekildi kóptegen baǵyttar qarastyrylǵan.
Shyǵys Eýropa men Ortalyq Azııanyń «Úzdik 300 ýnıversıteti» qataryna kirgen joǵary oqý oryndary jaǵynan Reseı kósh bastap tur. Ekinshi orynda Túrkııa, odan keıin Qazaqstan. Ál-Farabı atyndaǵy QazUÝ aldyńǵy jıyrmalyqqa kirdi.
Aıta keterligi, Elbasy «Qazaqstandyqtardyń ál-aýqatynyń ósýi: Tabys pen turmys sapasyn arttyrý» atty halyqqa Joldaýynda «Bilim sapasyn baǵalaý júıesi halyqaralyq standarttarǵa negizdelýge tıis», dep tapsyrǵan bolatyn.
Eske sala ketsek, bıyl «Atameken» UKP mınıstrlikpen birlesip otandyq joǵary oqý oryndaryndaǵy 64 mamandyq boıynsha bilim berý baǵdarlamalary reıtıngin jasaǵan edi. Zertteý nátıjesi shilde, qyrkúıek aıynda jarııa etildi.
Joǵary oqý oryndary 12 baǵyt boıynsha baǵalandy. Olar: qaýymdastyqtyń qatysýymen bilim berý baǵdarlamasyn daıarlaý, jumys berýshilerdiń qatysýymen bilim berý baǵdarlamasyn daıarlaý, bilim berý baǵdarlamasyna salynatyn ınvestıtsııalar, oqytýshylardyń atalǵan saladaǵy (óndiristegi) tájirıbesi qansha, bilim berý baǵdarlamasynyń halyqaralyq akkredıtatsııasy, túlekter jalaqysynyń ortasha kórsetkishi, jumysqa turǵandar paıyzy jáne t.b. Zertteý nátıjesinde «Qazaq tili men ádebıeti» páni boıynsha bilim berý baǵdarlamasy boıynsha birinshi oryndy M.Qozybaev atyndaǵy Soltústik Qazaqstan memlekettik ýnıversıteti alǵan. «Agrarly tehnıka men tehnologııalary» mamandyǵyn M. Dýlatov atyndaǵy Qostanaı ınjener-ekonomıkalyq ýnıversıtette jaqsy daıarlaıdy. «Fızıka» pánin Q. Jubanov atyndaǵy Aqtóbe memlekettik aımaqtyq ýnıversıtet pen ál-Farabı atyndaǵy Qazaq Ulttyq ýnıversıtette jaqsy oqytady. Al «Esepteý tehnıkasy men baǵdarlamalyq qamtamasyz etý» mamandyǵyn oqytýda QBTÝ kósh bastap tur. Reıtıng nátıjesi «Atameken» UKP saıtynda jarııalanǵan.
Bilim berý baǵdarlamalarynyń reıtıngi joǵary oqý oryndarynyń memleket pen bızneske qajet bilikti kadr daıarlaýdaǵy jumys tıimdiligin arttyrý úshin ótkiziledi. Eńbeginiń basty nátıjesi - túlekterdiń jumysqa ornalasýy bolyp sanalatyn joǵary oqý oryndary men kolledjderde elbasynyń joldaýynda aıtylǵan mindetter boıynsha profıldeý júrgiziledi. ıAǵnı, suranys joq mamandyqtardyń lıtsenzııasy qaıtarylady. Osylaısha, naryqta tek joǵary sapaly bilim beretin JOO ǵana qalady.
Joǵary oqý oryndarynyń tıimdiligin túlekterdiń jumysqa ornalasýy arqyly baqylaý ádisi oktıabrde ótken sapaly bilim berýdi qamtamasyz etýge arnalǵan Ortalyq Azııa halyqaralyq forýmynda da sarapshylardyń nazarynda boldy. TMD elderiniń bilim jáne ǵylym mınıstrlikteri, eýropadaǵy halyqaralyq uıym basshylary, shet eldik akkredıtatsııa organdary, JOO men memlekettik organ ókilderi oqý baǵdarlamalary men naryqta suranysqa ıe bolatyn maman daıarlaý máselelerin talqylady. Sharany Tuńǵysh Prezıdent qory men táýelsiz akkredıtatsııa men reıtıng agenttigi birlesip uıymdastyrdy.
«Eger biz qandaı da bir joǵary oqý ornynyń maman daıarlap, biraq olar naryqta suranysqa ıe bolmaǵanyn baıqasaq, bul - atalǵan joǵary oqý ornynda sapaly bilim berý barysynda problema bar degendi bildiredi. Sol sebepti biz bilim berý baǵdarlamalarynyń reıtıngi tóńireginde aýqymdy jumystar atqaramyz», - dedi Ashat Aımaǵambetov.