Qazaqstan Shveıtsarııadaǵy beıbitshilik sammıtine qatysa ma

<p>ASTANA. KAZINFORM &ndash; QR Syrtqy ister mınıstrliginiń resmı ókili Aıbek Smadııarov Shveıtsarııadaǵy beıbitshilik sammıtine Qazaqstannyń qatysýy múmkindigine qatysty suraqqa jaýap berdi.</p>

«Bul sammıtke elimizdiń qatysýy halyqaralyq is-sharalar kestesine sáıkes jáne osy másele boıynsha Qazaqstannyń resmı ustanymyn eskere otyryp qaralady. Ózderińiz biletindeı, Qazaqstan Ýkraına jáne Reseımen tarıhı jaǵynan birdeı tyǵyz saıası, ekonomıkalyq, mádenı-gýmanıtarlyq qarym-qatynasty qoldaıdy. Biz árqashan barlyq eldiń táýelsizdigi men aýmaqtyq tutastyǵyn saqtaý jáne BUU Jarǵysy qaǵıdattaryn oryndaý turǵysynan sóıleımiz. Osy jaǵdaıda biz halyqaralyq quqyq pen BUU Jarǵysy qaǵıdattary negizinde bul qaqtyǵysty osy elder arasyndaǵy ekijaqty qatynastar deńgeıinde tek beıbit jolmen sheshýdi dáıekti túrde qoldaımyz», - dedi A. Smadııarov mınıstrliktegi aptalyq baspasóz máslıhatynda.

Eske salsaq, bıylǵy 15-16 maýsym aralyǵynda Shveıtsarııada Ýkraınadaǵy jaǵdaıdy retteýge qatysty sammıt ótedi. Bul jıyn Ýkraına bıliginiń ótinishi boıynsha uıymdastyrylmaq.