18:08, 23 Qańtar 2026

Qazaqstan ishindegi áýe reısteriniń sany artady

ASTANA. KAZINFORM – 2026 jyly Qazaqstannyń ishindegi áýe reısteriniń sany artady. Bul týraly Parlament Májilisi janyndaǵy Qoǵamdyq palata otyrysynda Kólik mınıstrligi Azamattyq avıatsııa komıtetiniń tóraǵasy Saltanat Tompıeva málim etti.

Foto: freepik

- Memleket basshysynyń tapsyrmasy boıynsha bıyl Zaısan, Katonqaraǵaı, Kendirli áýejaılarynyń qurylysyn aıaqtaýdy josparlap otyrmyz. Sonymen qatar Arqalyq áýejaıyn qalpyna keltirý júzege asady. Osy oraıda aýqymdy qurylystyń aıaqtalatynyn eskere otyryp, ishki reıster jelisin keńeıtý josparda bar, - dedi S. Tompıeva.

Onyń aıtýynsha, osy baǵytta aldaǵy birneshe jylǵa sýbsıdııa bólý qajet bolady. Sondyqtan tıisti qoldaý alý úshin vedomstvo óz usynystaryn jarııalaıdy.

Eske salsaq, buǵan deıin Kólik vıtse-mınıstri Talǵat Lastaev 2026 jyly paıdalanýǵa beriletin Zaısan, Katonqaraǵaı, Kendirli áýejaılaryna bılet quny qansha bolatynyn aıtqanyn jazǵan edik.

Aıta keteıik, Arqalyq áýejaıyna Myrjaqyp Dýlatovtyń esimi berilmek.

Parlament QR Kólik mınıstrligi Ushaq

Rýslan Ǵabbasov

Aqmola oblysynyń Birjan sal aýdanynda dúnıege kelgen. L.N. Gýmılev atyndaǵy Eýrazııa ulttyq ýnıversıtetiniń jýrnalıstıka fakýltetin bitirgen. 2005 jyldan beri «QazAqparat» halyqaralyq aqparat agenttiginde jumys istep keledi.