Qazaqstan shıkizattyq emes taýarlar eksportyn 29 mlrd dolarǵa ulǵaıtpaq

NUR-SULTAN. QazAqparat – Qazaqstan shıkizattyq emes taýarlar eksportyn 29 mlrd dolarǵa ulǵaıtady. Bul nysandardy salý QR Ulttyq ekonomıka mınıstrligi ázirlegen «Qazaqstandyqtardyń ál-aýqatyn arttyrýǵa baǵyttalǵan ornyqty ekonomıkalyq ósý» ulttyq jobasy aıasynda qarastyrylǵan, dep habarlaıdy QazAqparat tilshisi.

QR UEM málimetinshe, jobanyń «Shıkizattyq emes eksportty ilgeriletý» baǵytynda 2025 jylǵa qaraı shıkizattyq emes eksport kólemin 41 mlrd AQSh dollaryna deıin ósirý mindeti sheshiledi. Ol úshin jańa eksporttaýshylardy shyǵarýǵa jáne jumys istep jatqan eksporttaýshylardyń quzyretterin arttyrýǵa baǵyttalǵan eksporttyq akseleratsııa baǵdarlamasyn damytý jalǵasady. 1 000 belsendi eksporttaýshynyń syrtqy naryqtarǵa shyǵýy qamtamasyz etiledi. Sonymen qatar 350-ge jýyq eksporttaýshyny elektrondyq saýda platformalaryna (Alibaba, Amazon, OZON) shyǵarý josparlanǵan. Memlekettik etalondardyń halyqaralyq talaptarǵa sáıkestigin qamtamasyz etý úshin synaq zerthanalyq bazalarynyń 30 paıyzy (250-den astam) jańǵyrtylady.

Eksporttaýshylardy syrtqy naryqtarǵa ilgeriletý úshin eksport aldyndaǵy jáne eksporttyq qarjylandyrý; saqtandyrý, aınalym qarajatyn tolyqtyrýǵa qarjylandyrý; eksporttaýshylardyń shyǵyndaryn óteý (saýda sóreleri men saýda alańdaryn jalǵa alý, sheteldik sertıfıkattaýdan, akkredıtteýden, ınspektsııadan ótý, taýarlardy shetelde jarnamalaý, sheteldik kórmelerge, forýmdarǵa, jármeńkelerge, konkýrstarǵa qatysý); eksporttaýshylardyń kólik shyǵyndaryn óteý qamtamasyz etiledi.

«Nátıjesinde shıkizattyq emes taýarlardyń eksporty 14-ten 29 mlrd AQSh dollaryna ulǵaıady. Kórsetiletin qyzmetter eksportynyń ósýi 2,4 eseni (5-ten 12 mlrd AQSh dollary) quraıdy», - dep atap ótedi mınıstrlikten.

Aıta keteıik, QR Prezıdenti Jarlyǵymen «Qazaqstandyqtardyń ál-aýqatyn arttyrýǵa baǵyttalǵan ornyqty ekonomıkalyq ósý» ulttyq jobasy bekitilgen bolatyn. Joba 5 baǵyttan turady jáne 6 negizgi mindet pen 13 kórsetkish aıqyndalǵan.