«Qazaqstan - sheteldik BAQ kózimen»: Úzdik avtorlar Býrabaıda boldy
«Vızıt Aqmola» týrıstik aqparattyq ortalyǵy taratqan aqparatqa qaraǵanda, ekskýrsııa barysynda sheteldik jýrnalıster «Qazaqstannyń injýi» sanalatyn Býrabaı kýrortyndaǵy «Jaılaý» etnoaýyly, Abylaıhan alańy, Vızıt ortalyǵynda boldy. Odan ári «Bólektaý» taýynyń bıik shyńyna shyǵyp, Kók shyǵanaq, Oqjetpes jáne Jumbaqtas taýlary men Býrabaı kóliniń sulýlyǵyn joǵardan baqylady.
Ashyq aspan astyndaǵy «Botaı-Býrabaı» arheologııalyq-etnografııalyq murajaıy qonaqtardyń qyzyǵýshylyǵyn odan saıyn eseleı tústi. Sheteldik týrıster tarıhqa bir sát oralyp, neolıt dáýirindegi qazaqtardyń álemine enip ketkendeı boldy.
Aıta keteıik, jyl saıyn baıqaýǵa Qazaqstannyń damýy týraly ár túrli taqyrypta qyzyqty maqalalar jarııalaǵan sheteldik avtorlar qatysady. Bıylǵy jyly jıyrma elden joldanǵan 85 maqalanyń ishinde 5-ýi jeńimpaz retinde tańdalyp alyndy. Baıqaý jeńimpazdaryna elimizdiń Astana, Almaty jáne Býrabaı kýrortynda saıahat uıymdastyrylyp, keń kólemde aqparattyq jáne mádenı baǵdarlama usynyldy.
TMD jáne Baltyq elderiniń avtorlary arasynda Ózbekstan Respýblıkasy Ulttyq aqparattyq agenttiginiń redaktsııasy úzdik bolyp tanyldy.
Al, eýropalyq jýrnalıster arasynda «Country and Townhouse» jýrnalyna «One Steppe Beyond» taqyrybymen maqalasy jaryq kórgen brıtanııalyq Djıllı Pıkap top jardy. Amerıkalyq jýrnalısteriniń ishinde Forbes basylymynyń tilshisi Stefena Lıpovtsevanyń «Qazaqstannyń jeti keremeti» maqalasy joǵary baǵalandy. Taıaý Shyǵys jáne Afrıka elderiniń jýrnalısteriniń arasynda ıordanııalyq Abdelhafez az-Zaben, Azııa, Avstralııa jáne Muhıt elderinen úndistandyq Indervır Sıngh «Business Central Asia» jýrnalynda «Astana: the capital has its own charms and pleasures» taqyrybymen shyqqan maqalasy baıqaý qazylarynyń kóńilinen shyqty.
Qonaqtardy qarsy alǵan Aqmola obylysynyń týrızm basqarmasynyń ókilderi óńirdiń týrıstik áleýetin aıta kele, Býrabaı kýrortyna kelgenderi úshin brendtik ónimderden estelik syılyqtar tartý etti.
Óz kezeginde qonaqtar da jyly qarsy alǵan aqmolalyqtarǵa shynaıy rızashylyǵyn bildirip, aldaǵy ýaqytta kýrorttyq óńir týraly qalam terbeıtindikterin aıtty.