Qazaqstan shetelden kelip jumys isteıtinderge beriletin kvotany 16% qysqartty

NUR-SULTAN. QazAqparat - Qazaqstan aýmaǵynda 16 278 sheteldik azamat jergilikti atqarýshy organnyń ruqsatymen eńbek etip júr, dep habarlaıdy QazAqparat.

Sheteldik jumys kúshin tartýǵa ruqsattardyń arasynda mynadaı sanattar bar: basshylar men olardyń orynbasarlary úshin 639 ruqsat (birinshi sanat), qurylymdyq bólimshelerdiń basshylary úshin 3 150 ruqsat (ekinshi sanat).

Tartylǵan jumys kúshi negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tıisinshe olar 8 115 jáne 825 adam.

Sondaı-aq maýsymdyq jumystarǵa 1 197 adam, al korporatıvtik aýystyrý aıasynda 2 352 adam tartyldy.

Qazirgi ýaqytta Qazaqstanda ShJK paıdalanatyn 1 683 jumys berýshi bar.

Onda 429 myńnan astam Qazaqstan azamattary jumys isteıdi, bul qyzmetkerlerdiń jalpy sanynyń 96% - yn quraıdy.

Eńbek mıgranttary keletin negizgi elder: Qytaı – 3 685 adam, Túrkııa – 1 977 adam, Úndistan – 1 268 adam, Ózbekstan – 1 195 adam, Serbııa – 1 109 adam.

Іshki eńbek naryǵyn qorǵaý maqsatynda QR Eńbek jáne halyqty áleýmettik qorǵaý mınıstrligi jyl saıyn respýblıkaǵa sheteldik mamandardy tartýǵa kvota belgileıdi jáne bóledi.

Osy jylǵy qańtarda iri otandyq bıznes ókilderimen kezdesý qorytyndysy boıynsha Memleket basshysynyń bergen tapsyrmasyn oryndaý úshin mınıstrlik sheteldik jumys kúshin tartýǵa arnalǵan kvotany buryn josparlanǵan 28 352-den 23 560-qa deıin, ıaǵnı 4 792 adamǵa (16%) qysqartty.