Qazaqstan sheteldegi kúdiktilerdi ustaý kelisimin 4 elmen bekitpek

ASTANA. QazAqparat - Parlament Senatynyń jalpy otyrysynda «Qazaqstan Respýblıkasy men Iordan Hashımıt Koroldigi arasyndaǵy adamdardy ustap berý týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Qazaqstan men Iordanııa arasyndaǵy atalǵan kelisimge 2017 jyldyń 1 qarashasynda Astanada qol qoıyldy.

Kelisim árbir ýaǵdalasýshy memlekettiń óz aýmaǵynda júrgen, ıaǵnı ustap berýge ákeletin qylmysy úshin suraý salýshy taraptyń aýmaǵynda qylmystyq qýdalaý nemese sot úkimin oryndaý maqsattarynda izdeý salynǵan adamdy ustap berýine baǵyttalǵan. Qujatta ustap berý jáne odan bas tartý úshin negizder eskerilgen.

«Qazirgi kezde Iordanııa aýmaǵynda Qazaqstannyń sot tóreliginen jasyrynyp júrgen adamdar joq, sondaı-aq ıordanııalyq bılik tarapynan bizdiń elde izdestirilip jatqan azamattar tirkelmegen. Jalpy, búginde Qazaqstan alys shetel elderimen osyndaı ekijaqty 19 kelisimdi bekitti», - dedi QR Bas prokýrorynyń orynbasary Andreı Lýkın.

Onyń sózine qaraǵanda, taıaý ýaqytta elimiz atalǵan halyqaralyq kelisimderge Makedonııa, Malaızııa, Kýba jáne Grekııamen arada qol qoıýdy josparlap otyr.

«Ekstradıtsııa máselelerine 2019 jylǵa memlekettik bıýdjetten 15 mln teńge bólindi. Atap aıtqanda, osy baǵytta qosymsha qarjy shyǵyndary qajet bolmaıdy», - dedi A. Lýkın.