Qazaqstan shet eldiń ozyq tájirıbesine negizdelgen sapaly zań jobasyn ázirledi - Nıderlandy elshisi

NUR-SULTAN. QazAqparat - Nıderlandy Koroldiginiń Qazaqstandaǵy elshisi Andreı Karstens QR Beıbit jıyndardy uıymdastyrý men ótkizý tártibi týraly zań jobasyna pikir bildirdi, dep habarlaıdy QazAqparat tilshisi.

«Bul zań jobasy óte mańyzdy, sebebi erkindik - qoǵamnyń basty negizi, halyqtyń óz pikirin bildirýge, jınalýǵa, jıyn uıymdastyrýǵa quqyǵy bar. Sońǵy ýaqytta Qazaqstan bul máselelermen belsendi aınalysyp keledi. Qazaqstan Prezıdentiniń «Halyq únine qulaq asatyn memleket» bastamasyn kótergeni qýantady. Parlamentten bastap, bul protseske kóptegen adamdar atsalysatyny belgili», - dedi elshi QR Syrtqy ister mınıstrliginde ótken kezdesýde.

Dıplomattyń aıtýynsha, zań jobasy boıynsha qazaqstandyqtar ǵana emes, sheteldikter de pikir bildire aldy.

«Mıtıngke qatysty másele óte ózekti. Barlyq elder osy joldan ótken. Ózge elderdiń tájirıbesin zerttep, qandaı másele týyndaǵanyn, qandaı qatelikter bolǵanyn eskerýge múmkindik bar. Ázirge bul protsess óte jaqsy, qarqynda júrip jatyr. Qazaqstannyń jaqsy sapaly zań jobasyn ázirleı alatynyna senemin. Barlyǵy tájirıbege, ortalyq jáne jergilikti organdardyń jumysyna baılanysty», - dedi A. Karstens.