Qazaqstan shekarasyn zańsyz kesip ótpek bolǵan shetel azamattary qolǵa tústi
19:19, 03 Tamyz 2022
NUR-SULTAN. QazAqparat - Qazaqstan shekarasyn zańsyz kesip ótpek bolǵan Reseıdiń eki, Qytaıdyń bir azamaty qolǵa tústi, dep habarlaıdy QR UQK baspasóz qyzmeti.
«2022 jylǵy 31 shildede Jetisý oblysy Panfılov aýdanynda shekarashylar Memlekettik shekarany buzýshylardyń jolyn kesti. Qytaı Halyq Respýblıkasynyń azamaty ustaldy, ol Qazaqstan Respýblıkasyna ótkizý pýnktinen tys jerden kirýge jáne keıinnen Eýropa elderine bet alýǵa talpynǵan.
2022 jylǵy 2 tamyzda Qazaqstan Respýblıkasy UQK Shekara qyzmetiniń Qostanaı oblysy Qarabalyq aýdanyndaǵy bólimshesi Memlekettik shekarany buzǵany úshin Qazaqstannyń aýmaǵynda qylmystyq qýdalaýdan jasyrynýǵa áreket jasaǵan Reseı Federatsııasynyń eki azamatyn ustady» delingen habarlamada.
Qazirgi ýaqytta ustalǵan quqyq buzýshylarǵa qatysty ýákiletti organdar sotqa deıingi tergeý júrgizýde.