«Qazaqstan» shahtasyndaǵy órt qashan sóndiriledi

ASTANA. QazAqparat – «ArselorMıttal Temirtaý» taý-ken segmenti atqarýshy dırektorynyń orynbasary Sergeı Ogaı shahtadaǵy órtti sóndirý jumystary týraly aıtty, dep habarlaıdy QazAqparat tilshisi.

«Abaı» shahtasyndaǵy jaǵdaımen salystyrýǵa bolmaıdy. Óıtkeni onda jarylys bolyp, apatty ýchaskege jetý múmkin emes edi. Búgin tańerteń apatty ýchaskeden birshama joǵary, atalǵan konveınerge taqaý bara aldyq. Órttiń taralmaıtynyn anyqtadyq. Bul jaıt azdy-kópti optımıstik boljam jasaýǵa múmkindik beredi. Degenmen qazirgi ýaqytta muny aıtý durys bola qoımas. Óıtkeni apatty joıý shtaby bar», - dedi ol Qaraǵandy óńirlik kommýnıkatsııalar qyzmeti alańyndaǵy brıfıngte.

Shahtadaǵy órtti sóndirýge qatysty Qaraǵandy oblysy ákiminiń birinshi orynbasary Vadım Basın de boljamymen bólisti.

«Órtti sóndire alatyndyǵymyzǵa qatysty optımıstik boljam bar», - dedi ol.

Eske salaıyq, «Qazaqstan» shahtasynda órt keshe, 17 tamyz kúni saǵat 10:05-te tutandy.

Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizi zardap shekti.

5 jumysshynyń taǵdyry belgisiz boldy. Keıin olardyń biriniń denesi tabyldy. Qalǵan 3 adamdy izdestirý jalǵasyp jatyr.

Qaraǵandydaǵy kómir shahtasynda zardap shekkenderdiń arasynda eki adam jansaqtaý bólimine jetkizilgeni týraly habarlaǵan edik.

Aıta keteıik, Prezıdent «Qazaqstan» shahtasynda bolǵan órt sebebin anyqtaý úshin jan-jaqty tergeý júrgizýdi tapsyrdy.