«Qazaqstan» shahtasyndaǵy órt: dárigerler shahterlerdiń jaǵdaıy týraly aıtty

QARAǴANDY. QazAqparat - Qaraǵandy ​​oblysynyń densaýlyq saqtaý basqarmasy «Qazaqstan» shahtasyndaǵy órtten zardap shekken eki adam Shahtınsk qalasynyń ortalyq aýrýhanasynda jatqanyn málimdedi, dep habarlaıdy QazAqparat.

«Kenshilerge aldyn ala qoıylǵan dıagnoz – jeńil dárejedegi kómirqyshqyl gazynan ýlaný. Taǵy ekeýi Maqajanov emhanasynda. Aldyn ala dıagnoz – kómirqyshqyl gazynan aýyr dárejede ýlaný. Olarǵa medıtsınalyq kómek kórsetilip jatyr», - dedi vedomstvonyń baspasóz qyzmeti.

Eske salaıyq, búgin saǵat 10:05-te «ArselorMıttal Temirtaý» AQ Kómir departamentiniń «Qazaqstan» shahtasynda konveıerlik taspa órtengenin habarlaǵan edik.

Sol kezde shahtada 227 adam bolǵan. Olar qaptal uńǵyma arqyly jer betine shyǵaryldy. Oqıǵa ornynda «Kásibı áskerılendirilgen avarııalyq-qutqarý qyzmeti» respýblıkalyq ortalyq shtabynyń jáne Tótenshe jaǵdaılar departamentiniń mamandary jumys istep jatyr. Órttiń shyǵý sebebi anyqtalý ústinde.

Oqıǵa ornynda Qaraǵandy oblysy ákiminiń birinshi orynbasary Vadım Basın men Shahtınsk qalasynyń ákimi Murat Qydyrǵanbekov júr.

Úsh kenshiniń taǵdyry ázirge belgisiz bolyp tur.