«Qazaqstan» shahtasyndaǵy órt: Bar kúsh adamdardy izdeýge jumyldyrylǵan

ASTANA. QazAqparat - Búgin tańerteń órt shyqqan «Qazaqstan» shahtasyna qutqarýshylardyń 4 bólimi jiberildi, taǵy ekeýi daıyn tur. Bul týraly Áskerılendirilgen kásibı apattyq-qutqarý qyzmeti respýblıkalyq ortalyq shtabynyń Qaraǵandy oblysy boıynsha fılıaly dırektorynyń birinshi orynbasary Gennadıı Sılınskıı aıtty, dep habarlaıdy QazAqparat.

«Shahtada órt áli de jalǵasýda. Biz qazir barlyq kúsh-jigerimizdi adamdardy izdeýge baǵyttadyq. Órtti sóndirýmen áli aınalyspadyq. Ókinishke qaraı, qazirgi ýaqytta bir adamnyń máıitin taptyq, bólim ony jer ústine evakýatsııalady. Qazir biz esepteýler júrgizdik, bloktyń joǵarǵy bóligindegi qazbalardaǵy tútindi azaıtý úshin manevrler jasadyq, óıtkeni shahtaǵa barǵan 12 bólimshe qoıý tútinge baılanysty adamdar bolýy múmkin oryndarǵa kire almady.

Tıisinshe, qozǵalys jyldamdyǵy tómen jáne qorǵanys respıratorynyń ýaqyty ári qaraı jumys isteýge múmkindik bermeıdi, óıtkeni qozǵalysy az qutqarýshy bólimsheler alysqa bara almaıdy. Qazir kórinisti jaqsartý úshin jeldetý manevrin jasadyq, shahtaǵa 4 bólim baǵyttaldy, 2 bólim daıyn tur. Biz adamdar bolýy múmkin skıptik uńǵy mańyndaǵy qazbalarǵa zertteý júrgizýdi josparlap otyrmyz. Bul málimetti bizge shahta qyzmetkerleri berdi. Osy barlaý nátıjeleri boıynsha taǵy qosymsha aqparat bere alamyz.

Sonymen birge, bizde paıda bolǵan múmkindikti paıdalanyp, negizgi konveıer keńistiginiń joǵarǵy bóligin barlap jatyrmyz, bul shahtany apatqa deıingi rejımde jeldetýdi qalpyna keltirý boıynsha ári qaraı sheshim qabyldaýǵa múmkindik beredi. Bul arqyly órt oshaqtaryndaǵy avarııalyq qazbaǵa tikeleı kire alamyz jáne shahta blogyndaǵy tútindi azaıtyp, biz áli barmaǵan qazbalarǵa óte alamyz» delingen habarlamada.

Aıta keteıik, buǵan deıin Qaraǵandy oblysynda shahta órtenip, 227 adam evakýatsııalanǵany týraly habarlaǵan edik.

Qazirgi sátte osy apattan japa shekkender sany 8 adamǵa jetti.

Sondaı-aq, eki jumysshynyń denesi tabylǵany týraly aqparat tarady, biraq keıin tek bir adamnyń denesi tabylǵany naqtylandy.