Qazaqstan shahtasyndaǵy órt: Apat ornyndaǵy ahýal qalaı

ASTANA. QazAqparat - 22 tamyzda saǵat 8.00-degi jaǵdaı boıynsha Qazaqstan shahtasyndaǵy órt oshaqtary áli de sónbegen, jaǵdaı jaqsarǵan joq, dep habarlaıdy QR TJM baspasóz qyzmeti.

Órttiń taralýyna jol bermeý úshin jumystar júrgizilýde. Osyǵan baılanysty KÁAQQ RShO shahtadaǵy avarııany joıý shtab basshylyǵy gıpsten kópirler salý arqyly apatty ýchaskeni oqshaýlaý týraly sheshim qabyldady.

Kópirler salý oryndary anyqtaldy, materıaldardy jetkizý bastaldy, sodan keıin barlyq kúshterdi apattyq ýchaskeni oqshaýlaýǵa jiberý josparlanýda.

Eske salsaq, Qaraǵandy oblysyndaǵy «Qazaqstan» shahtasynda órt 17 tamyz kúni saǵat 10:05-te tutandy.

Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizi zardap shekti.

Shahtanyń astynda qalyp qoıǵan besinshi kenshiniń denesi tabyldy.

18 tamyzdaǵy jaǵdaı boıynsha medıtsına mekemelerinde órtten zardap shekken 11 kenshi em qabyldap jatty.

Eńbek jáne halyqty áleýmettik qorǵaý mınıstrligi Eńbek jáne áleýmettik qorǵaý komıtetiniń tóraǵasy Tólegen Ospanqulov málim etkendeı, «Qazaqstan» shahtasyndaǵy apat úshin jaýapty tulǵa 7 jylǵa deıin túrmege qamalýy múmkin.

Prezıdent Qasym-Jomart Toqaev órt sebebin anyqtaý úshin jan-jaqty tergeý júrgizýdi tapsyrdy.
Al, keshe shahtadaǵy órt oqıǵasyn arnaıy tergeý úshin Eńbek jáne halyqty áleýmettik qorǵaý mınıstrligi komıssııa qurdy.