«Qazaqstan» shahtasyndaǵy apat úshin jaýapty tulǵa 7 jylǵa deıin túrmege qamalýy múmkin

ASTANA. QazAqparat – «Qazaqstan» shahtasyndaǵy apat úshin jaýapty tulǵa 7 jylǵa deıin túrmege qamalýy múmkin. Bul týraly Eńbek jáne halyqty áleýmettik qorǵaý mınıstrligi Eńbek jáne áleýmettik qorǵaý komıtetiniń tóraǵasy Tólegen Ospanqulov aıtty, dep habarlaıdy QazAqparat tilshisi.

«Bul toptyq qaıǵyly jaıt sanalady. Qylmystyq kodekske sáıkes, eger sot basshylyq shynymen de kináli dep tanysa, onda 7 jylǵa deıin qylmystyq jaýapkershilik qarastyrylǵan», - dedi ol Qaraǵandy óńirlik kommýnıkatsııalar qyzmeti alańyndaǵy brıfıngte.

Al Qaraǵandy oblysy ákiminiń birinshi orynbasary Vadım Basın jaýapkershilik deńgeıin sot aıqyndaıtynyna nazar aýdartty.

«Qaıǵyly jaıttyń sebepterin, qyzmetkerlerdiń ólimin tergeý aıaqtalǵannan keıin materıal sotqa beriledi jáne sot jaýapkershilikti aıqyndaıdy. Komıssııa materıaldarynda qaýipsizdik tehnıkasyn, laýazymdyq nusqaýlyqty buzǵan tulǵanyń is-áreketteri kórsetiledi. Muny sot aıqyndaıtyn bolady», - dedi oblys ákiminiń birinshi orynbasary.

Eske salaıyq, «Qazaqstan» shahtasynda órt keshe, 17 tamyz kúni saǵat 10:05-te tutandy.

Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizizardap shekti.

5 jumysshynyń taǵdyry belgisiz boldy. Keıin olardyń biriniń denesi tabyldy. Qalǵan 3 adamdy izdestirý jumysy jalǵasyp jatyr.

Qaraǵandydaǵy kómir shahtasynda zardap shekkenderdiń arasynda eki adam jansaqtaý bóliminde jetkizilgeni týraly habarlaǵan edik.

Aıta keteıik, Prezıdent «Qazaqstan» shahtasynda bolǵan órt sebebin anyqtaý úshin jan-jaqty tergeý júrgizýdi tapsyrdy.