Qazaqstan shahtalaryna adamnyń ornyna robottar túsedi

ASTANA. QazAqparat -  Búgin Úkimettegi baspasóz máslıhatynda Investıtsııalar jáne damý mınıstri Jeńis Qasymbek «aqyldy kenish» baǵdarlamasy aıasynda qandaı ózgerister bolatynyn aıtty berdi, dep habarlaıdy QazAqparat.

«Bıyl qyrkúıek aıynda halyqaralyq sarapshylarmen birge ónerkásipterdiń Indýstrııa 4.0 tehnologııasyna ótýge daıyndyǵynyń tehnıkalyq taldaýyn aıaqtaımyz. Al, jyl sońyna qaraı 2025 jylǵa deıin Indýstrııa 4.0 elementterin engizý boıynsha Úkimet qaýlysyna sáıkes qadamdyq jospardy qabyldaý kútilýde»,-dedi Jeńis Qasymbek.

Osy oraıda ol mınıstrlik ERG, KazZinc, ArcelorMittal, Qazaqmys jáne basqa da júıequraýshy iri kompanııalarmen tıisti jumystar júrgizilip jatqanyn atap ótti. Búgingi tańda atalmysh kásiporyndar ózderiniń tsıfrly jańǵyrý josparlaryn daıyndap, «aqyldy kenish» sııaqty baǵdarlamalaryn iske asyrýǵa kirisip ketkenin atap ótken jón.

«Onda barlyq derekterdi taldaý,  aldyńǵy qatarly datchıkter men sensorlar, ıntegratsııalanǵan aqparattyq júıeler (ERP, MES), robottandyrý operatsııalary sııaqty taǵy basqa da tehnologııalar engiziletin bolady. Mysaly, ERG kompanııasy aldaǵy 10 jylda shamamen 800 mlrd teńgeniń tsıfrlandyrý jobasyn ınvestıtsııalaýdy josparlap otyr»,-dedi vedomstvo basshysy.

Onyń aıtýynsha, Indýstrııa 4.0 tehnologııasyna kóshý protsesi álem boıynsha áli bastapqy kezeńde keledi.

«Bizde bul protsesten qalmaýdyń múmkindigi bar. Mundaǵy máseleniń barlyq qıyndyqtaryna qaramastan, biz Indýstrııa 4.0 tehnologııasy Qazaqstan úshin jańa múmkindikter ákeletinin kórip otyrmyz. Sonyń ishinde tıimdilikti arttyrý, jańa bıznes pen eksportqa baǵyttalǵan óndiris qurý máselelerin aıtýǵa bolady»,-dedi J. Qasymbek.